Вяртанне Траецкай гары

Дзесяць раней безыменных сквераў Мінска набылі назвы.

Шпітальны, Камароўскі, Траецкая гара.... Дзе знаходзяцца гэтыя скверы? Тым, хто ведае сучасны Мінск, няцяжка будзе здагадацца. Першы — на вуліцы Куйбышава, побач з помнікам архітэктуры ХХ стагоддзя, будынкам Галоўнага ваеннага шпіталя Міністэрства абароны Беларусі. Другі, вядома ж, ля Камароўскага рынка: непадалёк ад гандлёвага цэнтра “Люстэрка” і Дома мэблі. А гістарычную назву “Траецкая гара” атрымаў вялікі сквер пры Нацыянальным акадэмічным Вялікім тэатры оперы і балета — у памяць пра даўнейшую Траецкую гару. Менавіта так, дарэчы, называлася і плошча, якая знікла ў 30-я гады, калі на ёй пабудавалі тэатр.