Сярод прэтэндэнтаў на званне лепшых значыліся паштовыя адміністрацыі больш чым 70 краін, якія даслалі на конкурс свае самыя прыгожыя выпускі марак 2007 года.Журы, якое складаецца з вядомых мастакоў марак, прадстаўнікоў аўстрыйскай пошты, дзяржаўнай друкарскай карпарацыі, філатэлістычнай прэсы зрабіла выбар на карысць Славакіі (першае месца і тытул “Самая прыгожая марка свету 2007 года”, краіне прысуджаны кубак “Галоўны прыз выставы WIPA” за мастацкае афармленне малога ліста з адной маркай “Браціслаўскі Замак”); Чэшскай Рэспубліцы (другое месца за блок “Мост Чарльза”); Швецыі (трэцяе месца за блок з двух марак у гонар 300-й гадавіны з дня нараджэння батаніка Карла Лінея). Маркі з Ісландыі і Бразіліі падзялілі чацвёртае і пятае месцы, Чылі заняла шостае месца за счэпку з трох марак, Украіна — сёмае, Ліхтэнштэйн — восьмае, Ганконг — дзевятае і Беларусь — дзесятае месца за блок з двух марак, прысвечаны 200-годдзю беларускага пісьменніка, мастака і музыканта Напалеона Орды.
