Сапраўдны карнавал на вуліцах Мінска наладзілі ўдзельнікі свята, якія па традыцыі прыехалі да месца дзеяння на прыгожым “Трамваі жаданняў”. Яркае касцюмаванае шэсце герояў студэнцкіх спектакляў весела рухалася па горадзе: ад ліцэя Беларускага дзяржаўнага універсітэта, што на вуліцы Першамайскай, да Палаца прафсаюзаў, дзе сёлета і праходзілі першыя фестывальныя спектаклі.Фэст “Тэатральны куфар” арганізуецца на базе Беларускага дзяржаўнага універсітэта, ён карыстаецца вялікай папулярнасцю, асабліва ў студэнцкім асяроддзі. На мінскіх сцэнах выступаюць студэнты-акцёры з блізкага і далёкага замежжа. Да таго ж аматарскія калектывы маюць магчымасць абмяняцца творчым вопытам, наладзіць новыя кантакты.
Сёлета ўпершыню за пяць гадоў “Тэатральны куфар” сабраў 20 тэатраў, гэта — амаль 300 артыстаў-аматараў з Беларусі, Расіі, Украіны, Літвы, Эстоніі, Балгарыі, Сербіі, Нідэрланлдаў, Германіі. Журы, у склад якога ўваходзілі вядомыя тэатральныя дзеячы, режысёры, крытыкі, узначальваў прэзідэнт Міжнароднай асацыяцыі універсітэцкіх тэатраў Жан Марк Лару. Членам журы давялося праглядзець 21 спектакль, перш чым размеркаваць намінацыі сярод удзельнікаў. У выніку перамогу на «Тэатральным куфры-2008» атрымаў студэнцкі тэатр Маскоўскага дзяржуніверсітэта імя М.Ламаносава са спектаклем «Сірано».
У ліку іншых на мінскім фэсце ўдала выступіў тэатр “TUT” Тартускага універсітэта. У гэтага калектыва ўсталяваліся цесныя культурныя кантакты з тэатрам “На балконе” БДУ. Падчас знаходжання ў Мінску мастацкі кіраўнік тэатра з Эстоніі Калеў Куду (яго спектакль “Псіхоз 4.48” прызнаны лепшым на фэсце па рэжысуры) правёў для беларускіх студэнтаў майстар-класы па тэатральнай тэхніцы і акцёрскім майстэрстве. У бліжэйшых планах двух тэатраў — абмен пастаноўкамі.
Мікалай Зайца
