На Гродзеншчыне болей за ўсё вяскоўцаў, якія перасягнулі стогадовы рубеж.
Па словах першага намесніка начальніка Гродзенскага абласнога ўпраўлення статыстыкі Алены Кухарэвіч, старэйшая жыхарка вобласці — Алена Машко. Нара-дзілася яна 10 лістапада 1892 года ў шматдзетнай сям’і ў вёсцы Вялікія Азяранкі Ваўкавыскага раёна. З дзяцінства была прывучана да цяжкай сельскай працы, якой і не цуралася ўсё жыццё.
Аптымістка па натуры, яна ніколі не сумавала і не пасавала перад цяжкасцямі. Алена Машко была замужам, яна маці траіх дзяцей. Цяпер з блізкіх сваякоў у яе засталіся шасцёра ўнукаў. Сем месяцаў назад жанчына пераехала да аднаго з іх у Ваўкавыск. Мае добрую памяць.
Успамінаючы маладосць, за навагоднім сталом выпіла нават чарку віна.
Усяго ў Беларусі па дадзеных на 1 кастрычніка мінулага года 100-гадовы рубеж пераадолелі 693 чалавекі — 598 жанчын і 95 мужчын. Свой 110-гадовы юбілей адзначылі 15 беларускіх доўгажыхароў, за плячамі траіх з іх — ужо 115 і больш гадоў жыцця.
Сярод рэгіёнаў Беларусі найбольш доўгажыхароў налічваецца ў Гродзенскай вобласці (185 чалавек ва ўзросце старэй за 100 гадоў). На другім месцы — Мінская вобласць (143), на трэцім — Брэсцкая (101). На Віцебшчыне пражываюць 85 чалавек, якія ўжо адзначылі стогадовы юбілей, у Гомельскай вобласці — 68, у Магілёўскай — 62, у Мінску — 49.
Вікторыя Самойлава
100 гадоў. І нават больш
На Гродзеншчыне болей за ўсё вяскоўцаў, якія перасягнулі стогадовы рубеж.