Свята Юр’я, заступніка жывёлы і гаспадаркі, адзначаюць сёння ў многіх рэгіёнах Беларусі. Але «Юраўскі карагод» у вёсцы Пагост Жыткавіцкага раёна мае свае асаблівасці і даўнія традыцыі. Да свята, паведамляе livingheritage.by, рыхтуюцца ўсёй вёскай. Прыбіраюць хаты і двары, выпякаюць і ўпрыгожваюць абрадавы каравай «карагод», рыхтуюць святочнае адзенне, а раніцай 6 мая ўсе разам выпраўляюцца ў поле, засеянае жытам. Наперадзе маладыя дзяўчаты нясуць вышыты ручнік, мужчыны — ікону, каравай, васьміканцовую зорку і зялёны фартух, прымацаваны на граблі, які пры выхадзе з поля будзе заменены на чырвоны.
Пры падыходзе да поля большасць удзельнікаў спыняецца на ўскрайку. У цэнтр выходзяць мужчыны з караваем і іконай і жанчыны, якія спяваюць рытуальныя песні і водзяць карагоды. Дзеянні падчас абраду, вераць мясцовыя жыхары, дапамагаюць забяспечыць урадлівасць зямлі і дабрабыт.
З поля ўдзельнікі «Юраўскага карагода» ідуць праз усю вёску, спяваючы песні і раздаючы кавалкі рытуальнага хлеба. За гэта аднавяскоўцы адорваюць іх яйкамі, печывам і іншымі пачастункамі. Гулянні, спевы і карагоды ў вёсцы працягваюцца да самага вечара. Сёння ў іх прымаюць удзел не толькі жыхары Пагоста, але і шматлікія госці. Улічваючы новы статус абраду, сёлета іх можа быць больш, чым звычайна.
mila@sb.by