Творчасць фальклорнага калектыву “Гасцінец” Ракаўскага цэнтра культуры адзначана Спецыяльнай прэміяй Прэзідэнта Беларусі.У 1998 годзе Лізавета Пятроўская пачала працаваць у Ракаўскім Доме культуры. З таго часу і ўзнік “Гасцінец”. Калектыў пачынаўся з трох сясцёр, а сёння тут больш за 15 удзельнікаў. Спявалі каляндарныя, сямейна-абрадавыя песні, ставілі абрадавыя святы. Матэрыял адшуквалі самі: вандруючы па раёне, распытвалі пра мясцовыя звычаі, адметнасці святкаванняў, запісвалі песні, паданні, вучыліся народным танцам.
У 2000 годзе “Гасцінец” атрымаў званне народнага і магчымасць удзельнічаць у конкурсах. З таго часу было шмат выступленняў. Асабліва насычаным быў мінулы год: шэраг праграм у Ракаве, святкаванне юбілею Мінскай вобласці, угодкаў Вінцэнта Дуніна-Марцінкевіча. Былі артысты на Міжнародным фестывалі-конкурсе сямейных калектываў у Мурманску (адтуль “Гасцінец” прывёз дадому Гран-пры). А яшчэ — канцэрт артыстаў Мінскай вобласці ў Маскве, удзел у раённых і абласных “Дажынках”, рэгіянальны конкурс песні ў Астраўцы, абласны фестываль сямейных калектываў.
Сем гадоў таму Лізавета Пятроўская стварыла і рознаўзроставы дзіцячы фальклорны калектыў “Вянок”. Ён сёння носіць званне ўзорнага, як і “Гасцінец”, не вяртаецца на Валожыншчыну без узнагарод. Найбольш значныя перамогі: першае месца на Рэспубліканскім фестывалі традыцыйнай культуры “Берагіня” і Гран-пры на фестывалі “Напеў зямлі маёй”. Запомнілася дзецям і паездка ў Германію, дзе артысты “Вянка” не толькі адпачывалі, але далучалі замежнікаў да жыватворных крыніц народнай творчасці. Традыцыйнае мастацтва — непаўторны летапіс гісторыі народа, нездарма ЮНЕСКА прызнала яго скарбам сусветнага маштабу.
На пытанне пра жыццёвыя прыярытэты Лізавета Пятроўская адказала: “Самае важнае ў жыцці — гэта любоў: да песні, да зямлі, да справы…”
Людміла Мінкевіч
