Пад вокладкай даведніка змешчана больш за 1000 артыкулаў. Яны прысвечаны блізкім і родным пісьменніка, людзям, якія мелі стасункі з Уладзімірам Сямёнавічам, даследавалі і даследуюць яго літаратурную дзейнасць, а таксама тым, для каго постаць і творчасць класіка сталі сапраўднай крыніцай натхнення. У энцыклапедыі змешчаны літаратуразнаўчыя артыкулы па раманах і аповесцях, найбольш значных нарысах Караткевіча, разглядаюцца мастацкія сродкі, якія выкарыстоўваў пісьменнік, распавядаецца пра месцы, дзе ён бываў, сустракаўся са сваімі сябрамі, натхняўся на новыя творы, паведамляе bel-en.by. Акрамя таго, у даведніку шмат ілюстрацый. Гэта фотаздымкі з дзяржаўных і сямейных архіваў, рэпрадукцыі жывапісных і графічных работ, прысвечаных асобе класіка і звязаных з мясцінамі, дзе ён бываў.
У падрыхтоўцы энцыклапедыі прынялі ўдзел навукоўцы вядучых ВНУ краіны, Нацыянальнай акадэміі навук, Беларускага дзяржаўнага архіва-музея літаратуры і мастацтва, супрацоўнікі Нацыянальнай бібліятэкі, журналісты-краязнаўцы Уладзімір Барысенка, Сяргей Галоўка і многія іншыя. Аўтары праекта спадзяюцца, што выданне стане першым крокам да стварэння шматтомнай энцыклапедыі «Уладзімір Караткевіч». А таксама мяркуюць, што некаторыя артыкулы даведніка могуць стаць паўнавартаснай тэмай для абароны кандыдацкіх і доктарскіх дысертацый, студэнты змогуць выкарыстаць іх для напісання курсавых работ, настаўнікі знойдуць шмат карыснай інфармацыі для падрыхтоўкі ўрокаў.
