Уручэнне Нацыянальных тэатральных прэмій урачыста прайшло на сцэне Купалаўскага тэатра
Уладальнікі ўзнагарод трэцяга рэспубліканскага конкурсу тэатральнага мастацтва “Нацыянальная тэатральная прэмія” названы вечарам 30 лістапада на цырымоніі ў Нацыянальным акадэмічным тэатры імя Янкі Купалы. На лаўры прэтэндаваў 21 спектакль, у тым ліку 11 пастановак тэатра драмы, 6 — тэатра лялек і 4 — музычнага тэатра.
Хто і ў якіх намінацыях прызнаны лепшым — пра тое напісалі розныя беларускія СМІ. Эфектным завяршэннем вечара стала аб’яўленне ўладальніка ўзнагароды “За ўклад у развіццё тэатральнага мастацтва”. На сцэну Купалаўскага тэатра выехаў… аўтамабіль “Шэўрале дэ Люкс” 1937 года — той самы, які належаў Янку Купалу. З яго выйшла народная артыстка Беларусі Наталля Гайда, якой намеснік прэм’ер-міністра Беларусі Анатоль Тозік уручыў узнагароду.
Упершыню Нацыянальныя тэатральныя прэміі ўручалі ў 2011 годзе. Арганізатарамі конкурсу выступаюць Міністэрства культуры Беларусі і Мінгарвыканкам.