Сярод іх і Уладзімір Корык, загадчык кафедры ваенна-палявой медыцыны Беларускага дзяржаўнага медыцынскага ўніверсітэта, доктар медыцынскіх навук, прафесар, палкоўнік медыцынскай службы. Практыкуе ў 2-й мінскай клінічнай бальніцы, адной з лепшых і найстарэйшых бальніц горада.
Знаёмая з Корыкам, напэўна, гадоў гэтак дванаццаць. Так склалася, што не раз даводзілася бываць у аддзяленні экстраннай хірургіі 2-й клінічнай бальніцы. І самой у яго лячыцца, і па кансультацыю звяртацца, і сяброў наведваць. Назірала яго і падчас абходаў, сярод урачоў аддзялення і студэнтаў, і ў зносінах з сярэднім медыцынскім персаналам. Але літаральна з першага дня знаёмства падумала пра яго: гэты чалавек на сваім месцы. Чаму? А ўсё проста. Уладзімір Корык — чалавек добразычлівы. Гутарыш з ім і адчуваеш сябе абароненым. Яшчэ ён умее гаварыць з пацыентамі на зразумелай для іх мове. Не памылюся, калі скажу: інтэлігентнасць у гэтага доктара ў крыві. Вядома, гэта не толькі яго адукаванасць, а хутчэй той стыль жыцця, які фарміраваўся з дзяцінства, які быў уласцівы яго бацькам. І ён няўлоўна праяўляецца ў голасе, інтанацыях, у выразе твару і нават у размове. Дзесьці я чытала пра тое, што інтэлігентнасць гэта не “што”, а “як” і звязана яна з унутранай годнасцю чалавека. Такі, па-мойму, Уладзімір Яўгенавіч, урач, якога яшчэ вылучае стрыманасць, такт і павага да суразмоўцы. І, безумоўна, высокі прафесіяналізм.
Пра тонкасці работы сучаснага хірурга, пра яго самога і пра іншых прадстаўнікоў гуманнай і адказнай прафесіі, людзей высокага грамадскага абавязку, мы і гутарым з Уладзімірам Корыкам.
— Уладзімір Яўгенавіч! Што падштурхнула вас выбраць шлях медыцыны? Можа, прачыталі ў дзяцінстве кніжку Карнея Чукоўскага пра доктара Айбаліта і натхніліся? Ці бацькі былі ўрачамі?
— Я з сям’і патомных урачоў. Маці Галіна Іванаўна — мульці-доктар. Была гінеколагам, акушэрам, ігларэфлексатэрапеўтам. А бацька Яўген Фёдаравіч — кардыёлагам. Спачатку ён скончыў Кіеўскае ваенна-медыцынскае вучылішча, якога ў нашы дні, на жаль, ужо няма. Там рыхтавалі ваенных фельчараў. Пасля гэтага пяць гадоў праслужыў на Курылах афіцэрам. З маці пазнаёміўся ўжо ў Мінску, у медінстытуце. Пажаніліся бацькі студэнтамі, а потым паехалі разам працаваць у Смалявіцкую бальніцу. Маё дзяцінства праходзіла ў яе сценах з маленства. Таму пытанне з выбарам прафесіі наогул не стаяла. Потым бацька і галоўным урачом стаў. А калі ў Мінск пераехалі, працаваў у 4-м упраўленні Міністэрства аховы здароўя, займаў высокія пасады. У доме была вялікая бібліятэка з медыцынскіх кніг. І я іх уважліва вывучаў з дзяцінства. Быў і такі казус цікавы. Неяк я прыйшоў да маці на работу ва ўзросце 6 гадоў, зайшоў у аглядны кабінет, а там ляжала жанчына з гінекалагічным захворваннем. Я не спалохаўся і нават паставіў дыягназ. Што цікава, ён быў правільны. А калі ў мяне сын нарадзіўся, адной з яго любімых кніжак была тапаграфічная анатомія. Так што Айбаліт тут не прычым, хоць Карнея Чукоўскага ў дзяцінстве чытаў.
— Сын па вашых слядах пайшоў?
— Так, сын Яўген вучыцца на чацвёртым курсе лячэбнага факультэта.
— Як думаеце, у яго гэта прызванне ці вы яго ўгаварылі?
— Жонка так і падумала, калі ён прыняў рашэнне туды паступаць. Яшчэ ў школе Жэня хацеў стаць дыпламатам. І рыхтаваўся ў БДУ. Але, з’ездзіўшы ў скаўцкі лагер, рашэнне змяніў. Ніхто ў сям’і не настойваў. Ён сам выбраў медыцыну. Аднойчы я ўзяў яго з сабою на аперацыю: аперыравалі цяжкага пацыента. У перадаперацыйнай усіх папярэдзіў: калі Жэньку стане дрэнна, каб вывелі з аперацыйнай… Але ён усю аперацыю правісеў у мяне за плячом, пытаючы, што ды як. І я ўжо тады зразумеў: яму на самай справе гэта цікава. Яшчэ раз ён мяне здзівіў. Калі прыйшоў на практыку ў клініку, папрасіўся працаваць у аддзяленні рэанімацыі. Я нікому не гаварыў, што гэта мой сын. Было цікава паглядзець, як выстройваюцца яго адносіны з медыцынскім персаналам, сярэднім, перш за ўсё. Для мяне гэта асноўны персанал. Урачы выконваюць невялікую частку той работы, якая робіцца ў бальніцы. А асноўную, з майго пункту гледжання, робіць сярэдні медыцынскі персанал. Гэта і догляд, і выкананне прызначэнняў урачоў, і многае іншае. На жаль, ёсць урачы, якія не ўмеюць працаваць з сярэднім медыцынскім персаналам. І лепш за ўсё гэта разумеюць тыя дактары, якія самі былі і санітарамі, і медбратамі. Дык вось, сын з усімі хутка знайшоў агульную мову. Я не думаў, што Жэня настолькі міласэрны, бачачы, як ён даглядаў бездапаможных пацыентаў, як іх карміў…
Абход — важны момант у жыцці аддзялення экстраннай хірургіі
— Вашы родавыя карані адкуль?
— Бацька з Беразіно. Дарэчы, дзед мой быў сакратаром Бярэзінскага райкама партыі, арганізоўваў партызанскі рух у Беларусі падчас вайны. На жаль, загінуў ва ўзросце 36 гадоў. А прадзед (па мамінай лініі) быў святаром, пабудаваў у Глуску (Бабруйскі раён — Аўт.) царкву. Яго там дагэтуль паважаюць і памятаюць.
— Вы самі вучыліся ў Мінску?
— Пачынаў з медыцынскага вучылішча №2, што ў Мінску, скончыў яго з чырвоным дыпломам. Пасля паўгода папрацаваў на здраўпункце фарфоравага завода як фельчар, а потым мяне прызвалі ў рады Узброеных Сіл Савецкага Саюза. Праслужыўшы год, напісаў рапарт, што хачу паступаць у Ваенна-медыцынскую акадэмію імя С.М.Кірава ў Санкт-Пецярбурзе. На той час гэта была адна з самых магутных вядучых ВНУ, дзе рыхтавалі ваенных урачоў. Дарэчы, яе дыплом у савецкі час не патрабаваў пацвярджэння за мяжой. Скончыў акадэмію з адзнакай і залатым медалём, чым вельмі ганаруся. Дарэчы, у штабе акадэміі ёсць музей з мармуровымі плітамі, дзе золатам кожны год пішуць імёны выпускнікоў, якія атрымалі залатыя медалі. Так што і я прозвішча сваё там увекавечыў.
— Напэўна, у вас была магчымасць паехаць працаваць і за мяжу?
— Магчымасцяў было шмат, але я вярнуўся ў Беларусь, бліжэй да бацькоў: яны ўжо мелі патрэбу ў маёй дапамозе. Выпускнікі акадэміі маглі працаваць па любой медыцынскай спецыяльнасці, бо ўзровень падрыхтоўкі надзвычай шырокі. Спецыялізацыя ў ёй — па родах войскаў. Напрыклад, авіяцыйны — 3-ці факультэт, ваенна-марскі — 4-ы, а я заканчваў 2-гі — сухапутныя і ракетныя войскі. Прыехаўшы ў любую часць, выпускнік можа працаваць тэрапеўтам, і стаматолагам, і хірургам. Няма, скажам, стаматолага ў часці — будзеш стаматолагам. Вось такую шырокую спецыялізацыю я атрымаў.
— Пачыналі ў Мінску кім?
— Бачыў сябе кардыёлагам: тэрапія мяне захапляла. І вельмі ганарыўся, што не прачытаў ніводнага падручніка па тэрапіі — пра кожную хваробу чытаў толькі манаграфіі. Але мне прапанавалі пасаду хірурга ў асобным медыцынскім батальёне, дзе я праслужыў тры гады і зноў паехаў у Санкт-Пецярбург, у акадэмію. На факультэце кіруючага складу правучыўся яшчэ тры гады. Скончыў яго таксама з залатым медалём. За тыя тры гады абараніў і кандыдацкую дысертацыю. Так што ў мяне ёсць два медалі — адзін савецкага ўзору, адзін расійскага.
Калі вярнуўся ў Мінск, быў назначаны на пасаду старшага ардынатара аддзялення абдамінальнай хірургіі галоўнага клінічнага ваеннага шпіталя. А праз паўгода Сяргей Анатольевіч Жыдкоў, начальнік кафедры ваенна-палявой хірургіі, яе заснавальнік, а ў той час і галоўны хірург Міністэрства абароны, запрасіў мяне на кафедру выкладаць. Дзякуючы Сяргею Анатольевічу і медыцынскаму кіраўніцтву горада для падрыхтоўкі курсантаў і студэнтаў, акрамя ваеннага шпіталя, былі выбраны яшчэ дзве базы — 4-я бальніца і 2-я. Асноўная база знаходзіцца ў 2-й, бо тут ёсць аддзяленне экстраннай хірургіі. Такіх аддзяленняў усяго два: у бальніцы хуткай медыцынскай дапамогі і ў 2-й клініцы, якія працуюць кругласутачна і без выхадных.
“Прафесар Сяргей Жыдкоў — глыба ў хірургіі”. Падрыхтоўка да аперацыі
— Прафесія хірурга, напэўна, для вынослівых і псіхічна ўстойлівых — не для слабанервных. Калі і ў якой сітуацыі вы гэта зразумелі?
— Відаць, разуменне прыходзіць з практыкай. Вынослівасць, вядома, быць павінна. Але, па-мойму, прафесія мая больш звязана з псіхалагічнай устойлівасцю, чым з фізічнай падрыхтаванасцю. Ёсць, да прыкладу, маса аператыўных умяшанняў, якія звязаны з малаінвазіўнай хірургіяй. Яны патрабуюць вельмі карпатлівай, выверанай работы, якая не церпіць мітусні. Часам такія аперацыі доўжацца працяглы час: і восем, і дзесяць, і больш гадзін. Прызнаюся, я не бачыў у хірургіі людзей, якія былі б слабыя духам. Далёка не кожны можа зайсці ў аперацыйную і нанесці хвораму рану на карысць яго здароўя.
— Што скажаце пра нашу медыцынскую школу?
— Яна вельмі добрая. Адна з наймацнейшых у свеце. І я не разумею тых людзей, якія спяшаюцца лячыцца на захадзе. Трэба лячыцца ў сваёй краіне.
— Ці даводзілася вам фармуляваць для сябе нейкія асобасныя ўстаноўкі для таго, каб вытрымліваць напружанне ад аперацый?
— Трэнінгам ніколі не займаўся. І ўстановак не фармуляваў. Пачынаючы любую аперацыю, я абавязкова засяроджваюся. Гэта не кананічная малітва Богу. У мяне ёсць свой зварот, які пра сябе прамаўляю. Калегі ўжо ведаюць, што я не пачну аперацыю, пакуль не пастаю над пацыентам.
— Пры якіх абставінах зрабілі для сябе адкрыццё: хірург яшчэ павінен быць і добрым псіхолагам. Як пераносіце эмоцыі сваякоў пацыентаў, калі, скажам, пасля аперацый ёсць ускладненні?
— Калі хірург не ўмее размаўляць з пацыентам, то і аперыраваць не павінен. Паміж хворым і ўрачом павінен быць поўны давер і ўзаемаразуменне. А што датычыцца эмоцый сваякоў, то скажу, што гэта самая цяжкая частка нашай работы. Паведамляць ім пра тое, што іх сын, дачка, брат або нехта з бацькоў пайшоў з жыцця, заўсёды цяжка. Словы падтрымкі і суцяшэння ў такія моманты, як правіла, гучаць бессэнсоўна. І ўрач тады зведвае не меншы, чым сваякі, стрэс. Не дзень потым, не два прайграецца ў думках: а ці правільна ты ўсё зрабіў, каб прадухіліць смерць пацыента. І такое самаедства характэрна для нармальных урачоў.
Падчас аперацыі
— Як хутка вы навучыліся дыстанцыравацца ад уласных пачуццяў, перажыванняў і як рана пачалі сівець?
— Навучыцца немагчыма. І дыстанцыравацца таксама. Але сіндром эмацыйнага выгарання існуе. З часам, вядома, пачуцці прытупляюцца. Але хвалюешся штораз і пракручваеш, як я ўжо гаварыў, у думках, што ды як. А сівець пачаў у трыццаць з нечым. Што ж, гэта асаблівасць нашай прафесіі.
— Наколькі важныя ў ёй асабістыя якасці ўрача?
— Часта асабістыя якасці ніяк не ўплываюць на тое, што могуць рабіць рукі. І ў хірургіі гэта не рэдкасць. Урач можа быць бліскучым хірургам, а чалавекам, мякка кажучы, своеасаблівым: і няўжыўчывым, і не таварыскім, і рэзкім. Характары розныя ў людзей…
— Ваша работа патрабуе імгненных рэакцый і экстраннага рашэння, ад якога залежыць жыццё пацыента падчас аперацый. Як часта даводзілася дзейнічаць, засноўваючыся на інтуіцыі, а таксама на веры ва ўдачны зыход аперацыі?
— Калі гэта планавая аперацыя, то ўсё павінна быць пралічана. Зыход у такіх выпадках стапрацэнтна плануецца ўдачны. Але ў экстраннай хірургіі нечаканасці здараюцца. І звязана гэта не з апаратурай і не з хірургам, а часцей за ўсё са станам пацыента, працягласцю захворвання, яго ўзростам, а часам і з анатамічнымі асаблівасцямі пацыента.
— Сэрца справа знаходзіцца?
— І такое здараецца. І іншыя органы могуць размяшчацца атыпічна. Здараецца і падваенне анатамічных структур. А паспрабуй ты тады хутка разбярыся з тым, чаго не бачыў у анатамічным атласе. І ў такой сітуацыі няма нічога ганебнага ў тым, каб паклікаць кагосьці з дасведчаных калег на дапамогу для парады. У экстраннай хірургіі ёсць нюансы, асабліва ў абдамінальнай. Жывот чалавека як скрыня Пандоры. Адкрыеш яго — і за галаву схопішся. Не заўсёды сучасныя метады дыягностыкі адлюстроўваюць тое, што часам існуе на самай справе. І тады даводзіцца прымаць імгненнае рашэнне.
— Як вядома, хірург не мае права на некампетэнтнасць: яго работа часта на грані жыцця і смерці. Ці даводзілася вам адчуваць уласную віну, калі паміраюць пацыенты?
— Па маладосці гадоў нічога не баішся. Падаецца, галава поўная ведаў, а навыкаў і ўменняў няма. І страху няма! Але што цікава: жыццё, мабыць, любіць маладых урачоў і засцерагае ад многіх нечаканасцяў. Па меры набыцця досведу становішся больш асцярожным. І тады падаецца, што ведаў становіцца ўсё менш і менш. Хоць на самай справе іх менш не становіцца. Думаю, такое пачуццё нараджаецца нарастаючай з гадамі адказнасцю за тое, што ты робіш. А цяжар на душы адчуваеш заўсёды, калі пацыент адыходзіць з жыцця.
— Раскажыце пра сваё аддзяленне. Як вам у ім працуецца?
— Аддзяленне, у якім працую з 2002 года, вельмі добрае. Працуюць у ім у інтэнсіўным рэжыме, таму што, як прынята ў нас гаварыць, абарот койкі вельмі вялікі. Бывае, зробіш абход, і з 60 чалавек, скажам, 25 выпісваюцца, а да вечара ўжо няма месцаў. Работа ў аддзяленні вельмі цікавая і цяжкая. Як вавёрка ў коле, круцяцца ўсе на працягу 24 гадзін. Не ўсе вытрымліваюць гэты напружаны рытм, асабліва сярэдні персанал.
— А вы дзяжурыце па начах?
— Яшчэ некалькі гадоў назад дзяжурыў. Цяпер ужо не. Хоць гэтай работы не баюся: даводзілася дзяжурыць некалькі разоў на тыдзень. А не дзяжуру не таму, што стаў прафесарам. Проста ёсць людзі, якім трэба набірацца досведу, ды і падзарабіць.
— Што думаеце пра экспарт хірургічных паслуг?
— А чаму не? Сучасныя рэаліі такія, што клінікі павінны зарабляць грошы. І развіваць гэты прыярытэтны напрамак трэба.
— Хто для вас аўтарытэт у хірургіі?
— Я заканчваў такую ВНУ, дзе ўсе выкладчыкі, якія працавалі на любой кафедры, тэарэтыкі і практыкі, былі ўнікальнымі педагогамі і асобамі, людзьмі энцыклапедычнага розуму. Мне пашанцавала: многіх заспеў жывымі. Сістэма выкладання, адшліфаваная гадамі, была такая цікавая, што я літаральна ўсмоктваў веды. Дагэтуль жыве мой першы настаўнік па хірургіі, прафесар Ханевіч Міхаіл Дзмітрыевіч. Дарэчы, ён наш зямляк, беларус. Яшчэ Леанід Васільевіч Струкаў (вучань Паўла Мікалаевіча Напалкова). Калі ён аперыраваў, я не мог адарваць вачэй. Неяк я яму сказаў аб тым, што марыў бы зрабіць яго такім маленькім, каб ён мог змясціцца ў нагруднай кішэні майго медыцынскага халата. І калі трэба, даставаць і пытаць пра ўсё, чаго не ведаеш. Струкаў адказваў на любое пытанне. Я мог бы назваць шмат імёнаў сваіх піцерскіх настаўнікаў. Не магу не ўспомніць і нашага прафесара Жыдкова Сяргея Анатольевіча. Ён — заснавальнік нашай кафедры ваенна-палявой хірургіі і глыба ў хірургіі. У аддзяленні працаваў унікальны экстранны хірург Дзмітрый Дудараў. Цяперашні загадчык аддзялення Сяргей Аляксандраў таксама бліскучы хірург, але ўжо ў іншай галіне — у эндаскапічнай хірургіі. Робіць такія рэчы з дапамогай лапараскапічнай тэхнікі, што можна пазайздросціць. Гэта вялікі набытак для аддзялення. Нарайр Мелканян — удумлівы ўрач, карпатлівы ў рабоце, са сваімі цікавымі пунктамі погляду: ён не думае штампамі. І калі ёсць цікавы пацыент, яго лепш аддаць Нарайру. Ён пачынае яго раскручваць і знаходзіць прычыну захворвання.
— Ці сутыкаліся ў сваёй практыцы з цудоўным вылячэннем пацыента?
— А што лічыць цудоўным вылячэннем? Для мяне гэта ракавы пацыент, пра якога ведаеш, што яму ўжо нічога не дапаможа, а ён, насуперак захворванню, застаецца жыць. І жыве доўга і шчасліва. На жаль, такіх пацыентаў не сустракаў. Мабыць, яшчэ не час. Але духоўныя кнігі, у якіх апісваюцца выпадкі вылячэння, чытаў.
“Сяргей Аляксандраў, загадчык аддзялення, робіць такія рэчы з дапамогай лапараскапічнай тэхнікі, што можна пазайздросціць”
|
“Нарайр Мелканян — удумлівы ўрач, карпатлівы ў рабоце. Са сваімі цікавымі пунктамі погляду”
|
Уладзімір Корык задаволены тым, як прайшла аперацыя
|
“Сяргей Жыдкоў — глыба ў хірургіі”
|
— У палявых умовах я не аперыраваў. А з агнястрэльным раненнем мець справу даводзілася. Пры аказанні дапамогі такім пацыентам трэба ўлічваць тыя асаблівасці, якія крыху адрозніваюцца ад прынцыпаў лячэння ран у агульнай хірургіі. Нездарма ваенна-палявую хірургію выдзелілі ў асобную хірургічную дысцыпліну. Таму што раны, нанесеныя агнястрэльнай зброяй, кардынальна адрозніваюцца ад пашкоджанняў, якія бываюць у мірным жыцці. На жаль, аказваць дапамогу такім пацыентам умеюць не ўсе ўрачы.
— Што, па-вашаму, адрознівае добрага хірурга ад пасрэднага?
— Любоў да сваёй спецыяльнасці. Калі цікавасці да яе няма, то ніколі не станеш добрым урачом, ці то кардыялогія, ці то хірургія. Нездарма старажытныя людзі гаварылі, што добры ўрач падобны да Бога. Добры ўрач не стаіць на месцы, ён пастаянна развіваецца: чытае, наведвае выставы, знаёміцца з новымі дасягненнямі ў медыцыне, пераймае досвед у вядучых спецыялістаў… Ён не можа, не павінен спыняцца. За ім ідуць маладыя і славалюбівыя ўрачы, якія лёгка асвойваюць новыя тэхналогіі і якія гэтак жа лёгка абыдуць дасведчанага ўрача, які спыніўся.
— У якіх выпадках хірургі адмаўляюцца ад сваёй прафесіі?
— Мне даводзілася сутыкацца з такімі людзьмі. Ёсць і аднакашнікі, якія пайшлі з прафесіі. Ёсць людзі, якія зразумелі, што памыліліся ў выбары: яны не гатовыя суперажываць і аказваць дапамогу пацыентам. Сыходзяць і тыя, якіх не задавольвае фінансавае становішча.
— Што б вы як хірург хацелі ад сваіх пацыентаў?
— Большага разумення. Іншы пацыент лічыць сябе настолькі падрыхтаваным, што калі да яго прыходзіць доктар і пачынае нешта тлумачыць, то месца для яго тлумачэнняў у галаве ў хворага няма. Здараецца, што такая дасведчанасць садзейнічае канфліктным сітуацыям, калі пацыент пачынае вучыць доктара, што таму рабіць і як. Вось такія выдаткі дасведчанасці хворых праз інтэрнэт ды іншыя інфармацыйныя крыніцы. Я раней дыскутаваў з такімі пацыентамі, нешта спрабаваў растлумачыць. А цяпер проста адыходжу ад канфлікту і прадастаўляю хвораму магчымасць зразумець, хто ж з нас доктар, а хто пацыент. І гэта працуе! Назаўтра той знаходзіць мяне і просіць прабачэння.
— Якія якасці трэба развіваць, каб стаць хірургам? Што пажадалі б тым, хто сёння асвойвае ў сценах медыцынскіх універсітэтаў у Мінску, Віцебску, Гродне і Гомелі навуку хірургіі?
— Не ведаю, што трэба развіваць. Прызванне быць павінна. Можа, і лёс. Я ніколі не думаў, што стану хірургам, нават не марыў і не разглядаў ні адну з хірургічных спецыяльнасцяў як родную і блізкую. Але абставіны так склаліся. Мабыць, гэта лёс. Калі быў курсантам, сваю галаву ўяўляў у выглядзе губкі ў сціснутым стане. Калі яе расціскаеш, яна пачынае ўсмоктваць веды. Я пажадаў бы студэнтам, курсантам і слухачам, каб яны як мага больш карыснай інфармацыі ўсмоктвалі ў свае галовы, пакуль для гэтага ёсць магчымасць. Спатрэбяцца!
Валянціна Ждановіч
Фота: Іван Ждановіч, Юрый Мазалеўскі
Фота: Іван Ждановіч, Юрый Мазалеўскі