У 1580-х гадах па ініцыятыве караля польскага і вялікага князя літоўскага Стэфана Баторыя замак перабудавалі ў стылі рэнесанс. У рэканструкцыі ўдзельнічаў архітэктар з Фларэнцыі Санці Гучы. Ад старога замка часоў Вітаўта былі выкарыстаны ніжняя частка абарончых сцен, часткі вежы, а таксама падмурак і сцены княжацкага палаца.
У час руска-польскай вайны ў сярэдзіне XVII стагоддзя палац быў значна пашкоджаны. Пасля перабудовы ён набыў барочны дэкор і працягваў выконваць ролю каралеўскай рэзідэнцыі, а да таго ж стаў месцам правядзення генеральных соймаў Рэчы Паспалітай. Паўночная вайна і пажар 1735 года таксама не пашкадавалі замак, і яго зноў прыйшлося перабудоўваць. На гэты раз архітэктура палаца значна спрасцілася, а сам ён перастаў выконваць былыя функцыі. Тым больш што побач быў узведзены Новы замак.
Рэканструкцыя Старога замка суправаджаецца маштабнымі археалагічнымі даследаваннямі. З пачатку рэстаўрацыі, паведамляе БЕЛТА, знойдзена звыш 3 тысяч артэфактаў, сярод якіх, напрыклад, сярэдневяковыя ўпрыгажэнні, шахматныя фігуры, фрагмент шахматнай дошкі і іншыя каштоўныя прадметы.
mila@sb.by
Фото БЕЛТА