У райцэнтры Лоеў, што на Гомельшчыне, прыём грамадзян правяла намеснiк дырэктара Дэпартамента дзяржаўнай iнспекцыi працы Мiнiстэрства працы i сацыяльнай абароны
Кансультацыi i тлумачэннi па канкрэтных праблемах мясцовых жыхароў, што датычылiся выплат заработнай платы, пенсiённага забеспячэння, прадастаўлення працоўных адпачынкаў, i па iншых пытаннях былi прадстаўлены падчас выязнога прыёму грамадзян намеснiкам дырэктара Дэпартамента дзяржаўнай iнспекцыi працы названага мiнiстэрства Iрынай Шыляевай. Тых, хто наважыўся абмеркаваць са спецыялiстам хвалюючыя праблемы, у гэты раз набралася няшмат. I гэта толькi даказвае, што райвыканкам, iншыя органы мясцовай улады i кiравання, як кажуць, трымаюць руку на пульсе жыцця, стараюцца своечасова рэагаваць на праблемы мясцовага насельнiцтва.
Дапамагаюць чыноўнiкам у аператыўным разглядзе i вырашэннi «балючых пытанняў» жыхароў раёна выезды i рэгулярныя сустрэчы ў працоўных калектывах, прыёмы грамадзян па месцы жыхарства i iншыя формы кантактаў з людзьмi. Як зазначыла ў размове з карэспандэнтам «Р» кiраўнiк справамi райвыканкама Тамара Дземiдзенка, такая работа прыносiць жаданы эфект: сёлета колькасць зваротаў грамадзян у раённыя i вышэйшыя iнстанцыi скарацiлася i склала толькi каля 200, прычым больш за палову з узнятых праблем станоўча вырашаны, астатнiя патрабавалi толькi тлумачэнняў спецыялiстаў.
З адзiным арыенцiрам — на дзеючае заканадаўства i канкрэтныя абставiны, што прывялi людзей да прадстаўнiка Дэпартамента дзяржаўнай iнспекцыi працы, размаўляла з наведвальнiкамi на прыёме ў будынку Лоеўскага райвыканкама i Iрына Шыляева. Жыхар вёскi Сяўкi Уладзiмiр Шанцавалаў, што зараней запiсаўся на прыём, да прыкладу, звярнуўся да спецыялiста па пытаннi захавання бесперапыннага працоўнага стажу. У свой час гэты работнiк СПК «Дняпровец» звольнiўся з гаспадаркi i доўгi час працаваў за межамi краiны без афiцыйнага працаўладкавання. Потым вярнуўся ў вёску i ў сельгаспрадпрыемства. Вядома, што ў гэтым выпадку яго працоўны стаж лiчыцца перарваным i пры ўсiм жаданнi змянiць сiтуацыю на карысць заявiцеля нельга.
— Прыйшла да спецыялiста Мiнпрацы, каб дамагчыся права на паглыбленае лячэнне пасля атрыманай траўмы пазваночнiка, — расказала яшчэ адна наведвальнiца, работнiца школы з вёскi Крупейкi Тамара Касцючэнка. — На жаль, перагляд пастаўленага дыягназу — агульнае захворванне (ён не дае такой магчымасцi) — па розных прычынах адцягваецца, хаця з часу парушэння нармальнага стану арганiзма прайшло больш за год...
Цi можна Тамары Мiхайлаўне спадзявацца на атрыманне групы iнвалiднасцi пасля атрыманай бытавой траўмы, таксама кампетэнтна растлумачыла спецыялiст Мiнпрацы. Атрымала такiя ж канкрэтныя растлумачэннi па хвалюючым пытаннi аб выхадзе на пенсiю па выслузе гадоў i калега папярэдняй наведвальнiцы, работнiца сiстэмы адукацыi раёна Валянцiна Кардаш...
...Вырашэнне праблем, якiя найбольш хвалююць сёння жыхароў Лоеўшчыны, — работа ЖКГ, прадастаўленне льгот i кампенсацый, рамонты жылля i дарог — у значнай ступенi залежыць ад выдаткавання фiнансавых сродкаў. Але ж немалая колькасць пытанняў, што прыводзiць наведвальнiкаў да ўдзельнiкаў выязных прыёмных, на думку Iрыны Шыляевай, узнiкае з-за недахопу ведаў з боку наймальнiкаў.
— Кiраўнiкi не заўсёды ведаюць аб дзеючых нормах працоўнага заканадаўства, для кампенсацыi такiх прабелаў у арганiзацыях нярэдка адсутнiчаюць юрысты i падрыхтаваныя работнiкi кадравых служб, — iх месцы займаюць педагогi, iншыя малападрыхтаваныя кадры...
Адначасова з працягам практыкi выязных прыёмных супрацоўнiкi Мiнпрацы i сацыяльнай абароны робяць канкрэтныя захады па ўдасканальваннi шэрагу артыкулаў працоўнага заканадаўства. Парламентарыям для разгляду ўжо накiраваны адпаведныя прапановы, якiя, на думку спецыялiстаў мiнiстэрства, дапамогуць жыхарам рэспублiкi прасцей вырашаць хвалюючыя праблемы.
