Вёскі будучынi: IT-тэхналогіі, мадэрнізаваныя прадпрыемствы і безбар’ернае асяроддзе

У краіне падрыхтаваны тыпавыя праекты вёскі будучыні. У кожнай вобласці вызначаны населеныя пункты, на аснове якіх будуць апрабаваны пілотныя праекты. Мяркуецца ўзняць вёску на новы ўзровень, зрабіць так, каб яе жыхарам жылося не менш камфортна, чым гараджанам, тым самым палепшыць якасць жыцця на сяле і спыніць адток кадраў. Стварыць такую мадэрнізаваную вёску ў кожнай вобласці даручыў Прэзідэнт падчас рабочай паездкі на Магілёўшчыну ў лістападзе мінулага года. Карэспандэнт «Р» даведалася, якім населеным пунктам пашчасціла першымі трапіць у будучыню.


Прыкладам для пераймання стаў гарадскі пасёлак Копысь Віцебскай вобласці. Неўзабаве істотна палепшыцца якасць жыцця і ў жыхароў аграгарадкоў Астрамечава Брэсцкай вобласці, Замкі, што на Міншчыне, вёсак Ляскавічы Петрыкаўскага раёна і Александрыя Шклоўскага раёна, а таксама пасёлка Абухава пад Гроднам.

Выбар на гэтыя населеныя пункты паў невыпадкова. Напрыклад, у Абухава ёсць шмат-кватэрныя дамы, для жыхароў якіх прадугледжаны шматлікія сацыяльныя аб’екты: Дом культуры, лазня, амбулаторыя, спартыўная школа. Да таго ж ён вельмі ўдала размешчаны: стаіць амаль на аўтамагістралі Мінск – Гродна, побач – ГЭС і аэрапорт. Астрамечава славіцца мясной и малочнай прадукцыяй, а таксама яблыкамі і норкавымі футрамі.

Падрабязнасцямі пераўтварэння падзялілася Яўгенія Філімонава, прэс-сакратар Міністэрства архітэктуры i будаўнiцтва:

— Мяркуецца сфарміраваць у кожным з гэтых населеных пунктаў цэласны агульнапасялковы цэнтр; рэканструяваць, пераўзброіць і мадэрнізаваць вытворчыя, сельскагаспадарчыя прадпрыемсты, а таксама аб’екты культуры і камунальна-бытавога прызначэння. Плануецца правесці комплекснае добраўпарадкаванне і азеляненне, развіць інжынерна-транспартную інфраструктуру, стварыць безбар’ернае асяроддзе. Для развіцця прыватнага бізнесу і індывідуальнага прадпрымальніцтва можна будзе выкарыстоўваць пустуючы жыллёвы фонд. Самабытнасці і цікавасці вёскам павінна надаць стварэнне і развіццё аб’ектаў аграэкатурызму.

Пры мадэрнізацыі вёсак неабходна ўлічваць і значэнне ў сучасным жыцці IT-тэхналогій. З удзелам Белаграпрамбанка распрацоўваецца праграма па стварэннi  цэнтраў, дзе людзі могуць навучыцца, напрыклад, аплачваць праз інтэрнэт камунальныя паслугі.

nevmer@mail.ru