Ваенныя лёсы родных людзей хвалююць іх нашчадкаў, бо памяць не павінна перарывацца
Віктар Казлоў, чытач “НГ” з Санкт-Пецярбурга, прыслаў электронны ліст, у якім распавядае такую гісторыю. Яго цётка, Ефрасіння Яфімаўна Жагорына, якой ужо 86 гадоў, кажа, што ў час вайны была вязнем канцлагераў на тэрыторыі Беларусі — у гарадах Слуцк і Паставы. Але дакументаў, якія б пацвярджалі гэта, у яе, на жаль, няма. “Дзе можна знайсці такую інфармацыю?” — цікавіцца Віктар.
Мы патэлефанавалі ў службу пошуку Беларускага таварыства Чырвонага Крыжа і высветлілі наступнае. У сувязі з тым, што Ефрасіння Яфімаўна з’яўляецца грамадзянкай Расійскай Федэрацыі, то ёй ці яе родным трэба звярнуцца ў цэнтр пошуку і інфармацыі расійскага Чырвонага Крыжа (вул. Кузнецкі мост, 18/7, г. Масква, 107031). У запыце трэба ўказаць імя, імя па бацьку, прозвішча, год і месца нараджэння. А таксама паведаміць, у які час жанчына была ў канцлагеры і дзе. Спецыялісты сфарміруюць пошукавую справу і накіруюць яе ў таварыства Чырвонага Крыжа нашай краіны. Такая агульная практыка пошуку для замежных грамадзян. Да слова, нашы суайчыннікі могуць звярнуцца ў Беларускае таварыства Чырвонага Крыжа, каб даведацца, дзе на тэрыторыі замежнай дзяржавы пахаваны іх абаронца Айчыны. А таксама і па пытаннях знаходжання салдат у палоне (за мяжой). Запыт можна пакінуць на сайце гэтай арганізацыі www.redcross.by альбо напісаць ліст на адрас: вул. К. Маркса, 35, г. Мінск, 220030 (служба пошуку БТЧК).