Да кожнага канцэрта Іван Карызна рыхтуецца з вялікай адказнасцю. Але да выступлення ў Мінску, якое адбудзецца 5 сакавіка ў Вялікай зале Белдзяржфілармоніі, у музыканта асаблівае стаўленне. Беларускую публіку чакае цёплая сустрэча з яркім прадстаўніком сучаснай выканальніцкай школы. Іван Карызна сумесна з піяністам Барысам Кузняцовым прадставіць арыгінальную праграму, у якую ўвойдуць санаты Шуберта, Бетховена і Брамса.
— Кожная з трох выбраных для канцэрта санат — шэдэўр рэпертуару для струнных інструментаў, — каменціруе Іван Карызна. — Гэта творы з уласнай цікавай гісторыяй. Да прыкладу, Крэйцарава саната — адзін з найбольш вядомых камерных твораў Бетховена. Цікава, што да моманту прэм’еры кампазітар ледзь паспеў скончыць сачыненне, ноты яшчэ не паспелі перапісаць, так што сам Бетховен выконваў фартэпіянную партыю часткова па сваіх чарнавіках, а скрыпачу даводзілася зазіраць у ноты праз плячо піяніста.
