i зямля няхай радуецца,
i няхай святкуе ўвесь свет, бачны i нябачны,
бо паўстаў Хрыстос — радасць вечная.
Трапар 1–й песнi Пасхальнага канона
Дарагiя i ўзлюбленыя ў Госпадзе сабраты архiпастыры, высокашаноўныя прасвiтары i дыяканы, богалюбiвыя iнакi i iнакiнi i ўсе верныя дзецi Беларускай Праваслаўнай Царквы!
ХРЫСТОС УВАСКРЭС!
З Пасхальным лiкаваннем, якое перапаўняе сэрца, i светлай радасцю аб Уваскрэслым Госпадзе нашым Iiсусе Хрысце вiтаю вас у гэты вялiкi i светаспасiцельны дзень. У словах гэтага дзiвоснага воклiчу — аснова жыцця, якое перамагло смерць i тленне, дар надзеi i любовi, крынiца нашай веры.
Уваскрасенне Хрыстова — гэта трыумф любовi Бога да Свайго стварэння — чалавека, трыумф Божай любовi да кожнага з нас, любовi, якая вызвалiла нас ад улады дыявала. Апостал Iаан Багаслоў, пацвярджаючы гэтую думку, сведчыць, што «не мы ўзлюбiлi Бога, а Ён узлюбiў нас i паслаў Сына Свайго як умiласцiўленне за грахi нашы» (1 Iн. 4:10), Сына Божага, Якi пакутаваў дзеля нас i нашага спасення.
Кожны чалавек, нават самы апошнi грэшнiк, знаходзiць сёння надзею на спасенне, бо i ён адкуплены каштоўнай крывёю Iiсуса Хрыста. Але каб успрыняць плады гэтага вялiкага Адкуплення, трэба мець веру — такую, якая здольна поўнасцю змянiць наша жыццё. Для таго, хто веруе, усё магчыма, калi вера яго — шчырая, сардэчная (пар. Мк. 9:23). Гасподзь, Якi ёсць «уваскрасенне i жыццё», абяцае таму, хто веруе ў Яго, што калi ён i «памрэ, будзе жыць... кожны, хто жыве i веруе ў Мяне, не памрэ давеку» (Iн. 11:25–26).
Ад гэтага часу цемра граху i смерцi, якая аддзяляе чалавека ад Бога, знiшчана ўсёпераможнай сiлай i благадаццю Хрыстовага Уваскрасення. Божым Промыслам чалавеку падаравана iсцiнная свабода, магчымасць адраджэння ад смерцi да жыцця, магчымасць праабражэння. Праз Уваскрасенне Хрыстова чалавек атрымаў Божы дар i сiлу лячыць сваю прыроду i ўзыходзiць да богападобнай годнасцi.
Зараз кожны можа змянiць сваё жыццё, iдучы шляхам Евангельскiм, можа, абнавiўшыся i аднавiўшы ў душы стан мiру i любовi — «Царства Божага», якое «ўнутры вас» (Лк. 17:21), быць усыноўленым Богу. Гасподзь заклiкае нас: «Прыйдзiце, благаславёныя Айца Майго, прымiце ў спадчыну Царства, угатаванае вам ад стварэння свету» (Мф. 25:34).
Пасля Свайго Уваскрасення Iiсус Хрыстос, Подзвiгазаснавальнiк нашага спасення, кажа тым, хто прыйшлi да Яго магiлы: «Радуйцеся!» (Мф. 28:9), святыя апосталы паўтараюць услед за Бажэственным Настаўнiкам: «Заўсёды радуйцеся!», «Радуйцеся заўсёды ў Госпадзе!», таму што для верных прызначана на нябёсах найвялiкшая радасць i ўзнагарода (пар. 1 Фес. 5:16; Фiл. 4:4). Гасподзь абяцае, што ў жыццi вечным усе верныя Хрысту ўвойдуць «у радасць Гаспадара» свайго (Мф. 25:21).
Гэтая «радасць у Госпадзе» мае духоўную прыроду, бо падаецца благадаццю Святога Духа. Але пры гэтым мы не павiнны ўтрымлiваць гэты дар у сабе, скрываць яго, бо, пазнаўшы Пасхальную радасць, мы не можам не падзялiцца ёю з нашымi блiжнiмi, з тымi, хто нас акружае, «радуючыся з тымi, хто радуецца» (Рым. 12:15).
Мы з вамi зноў сталi ўдзельнiкамi вялiкай падзеi ўсяленскага значэння! Хрысцiяне вось ужо каля дзвюх тысяч гадоў у днi нi з чым не параўнальнай Пасхальнай радасцi пацвярджаюць яе iсцiннасць воклiчам:
ХРЫСТОС УВАСКРЭС!
У сённяшнюю эпоху, калi iмкненнi многiх людзей абмежаваны iмгненнымi клопатамi i турботамi, мiтуснёй, калi яны часта не задумваюцца (а хтосьцi i проста забывае) пра самае галоўнае — пра спасеннне душы, пра добры Промысл Божы, асаблiва важна асэнсоўваць гiсторыю чалавецтва ў святле Уваскрасення Хрыстовага, вучыцца ўсведамляць любоў Тварца, прамудрасць i розум Божы (пар. Рым. 11:33), якi вядзе чалавецтва па шляху спасення.
Гасподзь Сваiм Уваскрасеннем даруе кожнаму, хто паверыць Яму i пой-дзе ўслед за Iм, моц цялесных i духоўных сiл у служэннi Яму, Святой Царкве, Бацькаўшчыне, блiжнiм i грамадству ў цэлым. Гасподзь дапамагае ўкаранiць у нашых сэрцах Евангельскiя каштоўнасцi — любоў да Бога i блiжнiх, дух мiласэрнасцi i мiру, бо гэта — залог духоўнага перамянення свету, якое пачынаецца ў нашай душы i ў нашым сэрцы.
Уваскрасенне Хрыстова адкрывае чалавецтву сэнс жыцця на зямлi, раскрывае тайну Божага Промыслу праз падзеi, якiя адбываюцца вакол нас, i заклiкае мець цвёрды намер трымацца запаведзяў Гасподнiх. Уваскрэслы Спасiцель заклiкае нас вызначыць сваю жыццёвую пазiцыю i працаваць з поўнай аддачай сiл i здольнасцей на славу Божую i дзеля спасення сваёй душы. Iдучы Евангельскiм i спасiцельным шляхам, мы, натхнёныя i ўмацаваныя благадаццю Святога Духа, будзем здольнымi саграваць хрысцiянскай любоўю i цяплом сваiх сэрцаў i тых, хто жыве побач з намi, хто мае патрэбу ў нашым клопаце, хто пакутуе i смуткуе, хто перажывае жыццёвыя цяжкасцi i праблемы.
Царква заклiкае ўсiх нас дзялiцца радасцю сённяшняга Пасхальнага свята i, шчыра падтрымлiваючы адзiн аднаго, не толькi сёння, а ва ўсе днi нашага жыцця ўзрастаць у веры, надзеi i любовi.
Напаўняючыся радасцю аб Хрысце Уваскрэслым, зноў i зноў вiншую ўсiх вас са светлазарным святам Уваскрасення Хрыстовага i ад усёй душы вiтаю светаспасiцельным i радасным дабравесцем:
ХРЫСТОС УВАСКРЭС!
САПРАЎДЫ ЎВАСКРЭС ХРЫСТОС!
+ ПАВЕЛ, Мiтрапалiт Мiнскi i Заслаўскi, Патрыяршы Экзарх усяе Беларусi.
Пасха Хрыстова, 2018 год,
горад Мiнск.
