Гаспадарка ў iх сапраўды турботная, як выявiлася падчас нашай гутаркi з галоўным будаўнiком Вiцебскага аблспажыўсаюза Вiктарам Жукам. Аб’ектаў шмат, падначаленых у кiраўнiка ПМК амаль чатыры сотнi. Вiктар Канстанцiнавiч свайго роду аксакал у прафесii. Мае адзiны запiс у працоўнай кнiжцы. Як прыйшоў у будаўнiчую ПМК 27 гадоў таму назад, так i прапiсаўся тут назаўсёды, ужо 18 гадоў у якасцi кiраўнiка.
Зразумела, што сёння асноўная праца iдзе ў Оршы, якая рыхтуецца да рэспублiканскага фестывалю «Дажынкi-2008». Пад кiраўнiцтвам прараба Аляксандра Карпава тут шчыруе брыгада майстроў па аддзелцы i добраўпарадкаваннi рэстарана «Вясёлка». Будаўнiкi спажыўкааперацыi практычна без выхадных i свят завiхаюцца таксама на пляцоўках у сельскай мясцовасцi. У тым жа Аршанскiм раёне прыводзяць у святочны стан кафэ «Сустрэча», магазiн у пасёлку Высокае, мiнi-бар у пасёлку Юрцава. Каб не сорамна было паказаць аб’екты спажыўкааперацыi сiстэмы гандлю i грамадскага харчавання званым гасцям з усёй краiны.
Ды не аднымi аршанскiмi рыштаваннямi заняты будаўнiкi. Не менш важны заказ i ў Паставах, дзе на шэрагу аб’ектаў трэба да наступлення восеньскай слоты прывесцi ў парадак iнжынерныя сеткi, абнавiць сантэхнiку. А яшчэ ў праграме гэтага года ўзвядзенне трох дзесяткаў жылых дамоў у сельскай мясцовасцi, у аграгарадках.
Самае, жартам кажучы, вiдавочнае i неверагоднае, што будаўнiкi вiцебскай спажыўкааперацыi са штаб-кватэрай у Глыбокiм (у Вiцебску толькi будаўнiчы ўчастак цi структурнае падраздзяленне ПМК) практычна ўсе аб’екты здаюць пад ключ з уласнай сыравiны i матэрыялаў. Пару гадоў назад удалося даволi танна купiць у Фiнляндыi, усяго за 12 мiльёнаў рублёў, добрую пiлараму. А прадукцыi на ёй толькi за год выпрацавалi ажно на 350 мiльёнаў рублёў! Цяпер пiларама задавальняе патрэбы не толькi ў дошках, але i ў любых неабходных для будоўлi пiламатэрыялах, як для ўласных патрэб, так i з выгадай для iншых клiентаў.
На стацыянарнай базе ПМК за горадам Глыбокае дзейнiчае таксама дужа патрэбны цэх сталяркi. Разгортваецца i ўдасканальваецца вытворчасць уласных вокнаў i дзвярэй, iншых вырабаў. Не трэба кланяцца i пераплачваць утрая даражэй за гэта iншым вытворцам. Уласная кацельня на дровах дазваляе ў поўнай меры рыхтаваць сыравiну для сталяркi. За адну загрузку ў сушылцы пазбаўляюцца лiшняй вiльгацi ажно 20 кубаметраў пiламатэрыялаў. Вось i атрымлiваецца амаль замкнёны тэхналагiчны цыкл: ад распiлоўкi сырога бервяна, высушвання дошак i вырабаў з iх любых «дэталей» для будаўнiчых аб’ектаў.
Гэтак жа творча i ўдала вырашылi глыбоцкiя будаўнiкi i праблему з бетоннымi i цэментавымi «запчасткамi». Навучылiся i гэта самi рабiць, у прыватнасцi, падмуркавыя блокi, трубы i нават тратуарную плiтку. З гэтай задачай спраўляецца новы растворабетонны вузел. Тут нават з розных адыходаў, кавалкаў сiлiкатных блокаў, будаўнiчага смецця ствараюць якасны будаўнiчы матэрыял.
Не змог Вiктар Канстанцiнавiч устрымацца, каб не пахвалiцца яшчэ адной прыемнай навiной. На першы погляд каля чатырох соцень работнiкаў у ПМК — гэта сiла. Але ж многiя ўжо ва ўзросце. Асаблiвая патрэба ў кадрах масавых прафесiй. I як жа прадбачлiва кiраўнiцтва ПМК павярнулася да вырашэння праблемы! Сталi на месцы шукаць добраахвотнiкаў з моладзi i накiроўваць iх на вучобу ў спецыялiзаваныя прафтэхвучылiшчы Вiцебска, Полацка, Оршы i нават у Вiлейку. I вось за тры гады як «знайшлi» шэсць дзесяткаў майстроў розных рабочых спецыяльнасцей.
— Нядаўна 30 маладых будаўнiкоў папоўнiлi нашу ПМК, — радуецца Вiктар Жук. — I будзем працягваць iх падрыхтоўку ўласнымi сiламi.
Мудры ход. Свае глыбоцкiя хлопцы надзейныя. Да зямлi бацькоў больш прывязаныя, чым прыезджыя. Нават у родным глыбоцкiм лiцэi набралi дзве групы муляраў. Няхай вучацца. А там, калi зацiкавiць, то маладыя майстры не стануць шукаць лёгкага хлеба ў замежжы. I на роднай зямлi, на яе рыштаваннях работы непачаты край.
