У мінскім метро пачалі прадаваць жэтоны, выпушчаныя да 30-годдзя падземкі.
Ад ужо звыклых іх адрознівае малюнак на адным з бакоў. Тут размешчаны выявы станцый метро, якія запусцілі ў 1984 годзе, — па адной на кожнай «юбілейцы». Андрэй Кузьмін, прэс-сакратар метрапалітэна, паведамляе, што ўсяго плануецца выпусціць 600 тысяч святочных жэтонаў. Паступаць у продаж яны будуць да 30 чэрвеня — дня нараджэння падземкі. Дзейнічаць жа працягнуць і пасля свята.
Цікава, што колер новых жэтонаў застаўся малінавым. Аказваецца, гэта адна з шасці ступеняў іх абароны.
Каштуе «юбілейка», як і звычайны жэтон, 3700 рублёў.