Смартфонам можна будзе аплачваць праезд у метро і наземным транспарце, а таксама разлічвацца ў крамах, кафэ і іншых установах.
Начальнік аддзела карпаратыўных камунікацый velcom Мікалай Брэдзелеў падзяліўся з карэспандэнтам «Р», што смартфонам можна будзе аплачваць праезд у метро і наземным транспарце. Ім таксама можна будзе разлічвацца ў крамах, кафэ і іншых установах. Для аплаты трэба толькі паднесці прыладу да бескантактавага тэрміналу. Аплата адбываецца ў долі секунды. Інфармацыя аб праходжанні плацяжу адразу з'яўляецца на экране смартфона.
Аформіць бясплатную віртуальную карту можна ў мабільным дадатку. Наведваць офіс банка для гэтага не патрабуецца: дадатак дазваляе прайсці рэгістрацыю ў міжбанкаўскай сістэме ідэнтыфікацыі. Створаная Нацбанкам платформа папросіць пазначыць прозвішча, імя, асабісты нумар і нумар тэлефона. Па сутнасці, смартфон замяняе сабой банкаўскую бескантактавую карту. І да тэрмінала ў краме мы прыкладаем не картку, а тэлефон. Гаджэт заўсёды пад рукой — разлічвацца ім зручна і бяспечна.
Бескантактавымі банкаўскімі картамі ужо нікога не здзівіш, ды і плаціць за тавары і паслугі смартфонам можна ўжо год як. А вось плаціць за праезд у грамадскім транспарце праз экран свайго тэлефона пакуль у навінку.
Аднак ужо цяпер са смартфонам, роўна як і з бескантактавымі банкаўскімі картамі аднаго з банкаў краіны, можна прайсці праз турнікет на трох станцыях: «Плошча Леніна», «Плошча Якуба Коласа» і «Каменная горка». Што значна эканоміць час — не трэба стаяць у чарзе ў касу: прыклаў да валідатара тэлефон і бягом у вагон.
На працягу месяца метрапалітэн плануе ўкараніць аплату бескантактавымі банкаўскімі картамі абсалютна на ўсіх станцыях метро, таму ўсімі відамі смартфонаў, якія падтрымліваюць такую функцыю, таксама можна будзе разлічыцца за праезд.
Ілля НОВІКАЎ