Гродзенцы сабраліся на «Кірмаш праектаў», каб палепшыць культурнае жыццё горада.
Пасля абвяшчэння Гродна культурнай сталіцай Беларусі студэнты, гісторыкі, краяведы, мастацтвазнаўцы прапануюць свае ідэі: ажывіць занядбалыя будынкі ў цэнтры, стварыць літаратурны брэнд Гродна пры дапамозе плакатаў з партрэтамі і цытатамі беларускіх пісьменнікаў на вуліцах, наладзіць вытворчасць маладзёжнай вопраткі з беларускім арнаментам і iншае.
— Сустрэча накіравана не на выбар пераможцы, а на рэалізацыю ідэй, — гаворыць каардынатар грамадска-культурнай кампаніі «Будзьма беларусамі!» Хрысціна Марчук.
«Кірмаш праектаў» праходзіць у Гродне не ўпершыню. Летась у маі было прадстаўлена сем праектаў, тры з якіх зараз увасабляюцца ў жыццё.
