Слава пра Жыровiцкi абраз хутка разнеслася па наваколлi, i ў мястэчка пацягнулiся багамольцы.Сiла слова
Сацыякультурны тэлеканал «Беларусь 3» прапануе гледачам распачаць святочную ранiцу ў 8:10 з «Размовы пра духоўнае». У 10:00 будзе магчымасць далучыцца да паломнiкаў, а таксама памалiцца за здароўе родных i блiзкiх падчас трансляцыi сакральнай цырымонii ў Жыровiцкiм манастыры — буйнейшым у краiне архiтэктурным ансамблi XVII—XVIII стагоддзяў. Штогод па нябеснае заступнiцтва i дапамогу да галоўнай жыровiцкай святынi — цудатворнай iконы Божай Мацi — прыязджаюць тысячы вернiкаў. Лiчыцца, што Прасвятая Дзева заўсёды адказвае людзям сваёй лiтасцю.Пазнаёмiцца (калi вы яшчэ гэтага не зрабiлi) са знакамiтым абразом таксама можна будзе разам з вандроўнiкам i папулярным тэлевядучым Уладзiмiрам Богданам, якi ў 12:30 у праекце «Я хачу гэта ўбачыць» раскажа пра гiсторыю i архiтэктуру Жыровiцкага Свята-Успенскага манастырскага комплексу.
— Праграма выходзiць з 2014 года, i за гэты час я аб’ехаў на байку ўсю Беларусь, i не адзiн раз, — распавёў вядучы. — Прычым у новым сезоне мы не баялiся паўтарыцца з пункта гледжання геаграфiчных лакацый, таму што рабiлi ўжо зусiм iншую праграму — цыкл пра людзей з цiкавымi працай або захапленнямi. Кожныя горад цi мясцовасць мы спрабавалi паказаць праз чалавека, якi там жыве. I вы нават не ўяўляеце, колькi класных герояў знайшлi!
Шляхамi веры
Пра гiсторыю i сучаснае жыццё абiцелi i аграгарадка Жыровiчы, цудатворную iкону Божай Мацi, пра лёсы царкоўных дзеячаў, чыя духоўна-асветнiцкая праца была звязана з манастыром, а таксама пра помнiкi культуры i мастацтва, якiя ў свой час знаходзiлiся цi дагэтуль захоўваюцца ў Свята-Успенскiм манастыры, у нядзелю можна будзе даведацца з праграмы «Святынi Беларусi», якая пачнецца ў 7:45. Жыровiцкая абiцель мае для нашай краiны такое ж значэнне, што i Троiца-Сергiева лаўра для Расii i Кiева-Пячэрская для Украiны, гаворыць аўтар праекта Iнга Бялова:— Жыровiцкi манастыр, якi паўстаў на мяжы XV i ХVI стагоддзяў на месцы цудоўнага з’яўлення абраза Божай Мацi, нiколi не закрываўся i за доўгую гiсторыю свайго iснавання стаў буйным духоўным цэнтрам беларускага народа. Хрысцiянскiя духоўныя iдэалы i святынi натхнялi творцаў на плённую працу. На працягу пяцi стагоддзяў у Жыровiцкiм манастыры стваралiся i захоўвалiся лепшыя ўзоры кнiжнай, мастацкай, музычнай культуры нашага народа, iнтэлектуальныя помнiкi, дзейнiчалi навучальныя ўстановы для свецкiх i духоўных асоб.
За пяць гадоў, якiя прайшлi з моманту першага выпуску праграмы «Святынi Беларусi», Iнга Бялова, здымачная група Белтэлерадыёкампанii, а таксама гледачы тэлеканала «Беларусь 3» пазнаёмiлiся з гiсторыяй самых велiчных i цiкавых праваслаўных храмаў, касцёлаў i сiнагог нашай краiны. У праекце гучыць падрабязная iнфармацыя пра галоўныя абразы i iншыя ўшанаваныя святынi, важныя не толькi для вернiкаў, але i ў цэлым для людзей, якiя цiкавяцца гiсторыяй сваёй краiны, дапаўняе Iнга Бялова:
— Вядома, што беларуская зямля славiцца не толькi сваiмi прыроднымi ды культурнымi багаццямi. Ёсць у нас святынi, пакланiцца якiм штогод прыязджаюць тысячы паломнiкаў з розных канцоў свету. Камусьцi можа здацца незразумелым i дзiўным тое, што прымушае людзей адпраўляцца ў далёкi шлях, жыць часта не ў самых камфортных умовах... Таму мы даём магчымасць нашым гледачам здзейснiць такое ж паломнiцтва, але не выходзяцы з кватэры цi дома. I наша задача — максiмальна перадаць атмасферу i дух тых месцаў, якiя мы наведваем падчас здымак.
leonovich@sb.by
