У Гомелі праваахоўныя органы выявілі схему сістэматычных крадзяжоў прадуктаў, якія прызначаліся для харчавання дзяцей ва ўстановах адукацыі. Па падазрэнні ў дачыненні да злачынства затрыманы 11 работнікаў КУП «Гомельскі гарадскі камбінат школьнага харчавання».
Крымінальную схему распрацавала і ўзначаліла загадчыца склада названага прадпрыемства. Ёй дапамагалі калегі, якія таксама мелі свой інтарэс.
– На працягу 2017—2018 гадоў загадчыца склада стварала лішкі, – распавёў падрабязнасці намеснік начальніка ўпраўлення па барацьбе з эканамічнай злачыннасцю УУС Гомельскага аблвыканкама Сяргей Аксёнчык. – Для гэтага ў накладныя дакументы ўносілася належная колькасць прадуктаў практычна ўсёй лінейкі найменняў, але са склада іх адгружалася значна менш. Напрыклад, калі адной са школ прызначалася 60 бляшанак згушчанага малака, то на справе яна атрымлівала толькі 40. Аднак па дакументах усё было ў парадку: нібыта 60 бляшанак забралі са склада камбіната і столькі ж прыняла загадчыца школьнай сталовай.Зэканомленая згушчонка збывалася праз індывідуальных прадпрымальнікаў. Прычым не толькі ў Гомелі, але вывозілася і ў Расію. Тое ж тычылася астатніх прадуктаў: мяса, рыбы, грэчкі, кансерваў, сланечнікавага алею, мукі, цукру і іншых. Даведаўшыся пра гэта, міліцыя правяла праверку. На падставе атрыманых матэрыялаў Гомельскім гарадскім аддзелам Следчага камітэта была ўзбуджана крымінальная справа. На дадзены момант па ёй праходзяць 11 чалавек. Акрамя загадчыцы склада — кладаўшчык, таваразнаўца, грузчык, загадчыкі вытворчасці школьных сталовых.
– Падазроным інкрымінуецца здзяйсненне злачынства, прадугледжанага ч. 2 арт. 210 КК «Крадзеж шляхам злоўжывання службовымі паўнамоцтвамі, учынены групай асоб па папярэдняй змове», – паведаміла афіцыйны прадстаўнік упраўлення Следчага камітэта па Гомельскай вобласці Марыя Крываногава. – Вырашаецца пытанне аб выкарыстанні меры стрымання. Для больш эфектыўнага расследавання злачынства створана следчая група. Праведзены неадкладныя следчыя дзеянні.
Зараз высвятляюцца колькасць, асартымент выкрадзенага і, адпаведна, маштабы шкоды. Апроч іншага, накладзены арышт на дарагі аўтамабіль. Па дакументах ён належыць дачцэ загадчыцы склада. Прытым што ўладальніца транспарту афіцыйна з’яўляецца беспрацоўнай.
prolesk@sb.by
