Медыцынская сястра афтальмалагічнага кабінета Добрушскай паліклінікі Вольга Ходасава ўвайшла ў новы год у новай іпастасі
Большасць калег па працы называюць яе цяпер не інакш, як «Каралева». Незвычайны «статус» абаяльны, усмешлівы медработнік заваявала на нядаўнім конкурсе «Каралева Зіма», што праводзіўся сярод працаўнікоў медустаноў раёна.
Урэшце, сам зімовы марафон прыгажосці на сцэне Палаца культуры імя Куйбышава больш нагадваў шыкоўны навагодні баль, дзе дамы (а дастойнымі саперніцамі будучай Каралевы Зімы на конкурсе выступілі яшчэ пяць прыгожых, з арыгінальным творчым падыходам канкурсантак) грацыёзна дэфіліравалі ў сваіх вытанчаных вячэрніх строях, а затым з не меншай арыгінальнасцю прадстаўлялі журы карнавальныя касцюмы. Але напачатку быў конкурс «фотавізітовак», у якім удзельніцы мовай слайдаў арыгінальна распавялі пра асаблівасці сваёй прафесіі, захапленні, сямейныя клопаты. Асабліва цёпла ўспрыняла зала выступленні канкурсантак у творчым паядынку. І хаця тэматыка большасці песень, вершаў і танцавальных нумароў была сугучна пары года — зіме, у імправізаваных каютах фантастычнага лайнера з назвай «Палярная зорка» (у такім стылі аформілі сцэну!) гасцям, а ў ліку іх былі намеснік старшыні райвыканкама Уладзімір Емельянаў, старшыня райсавета дэпутатаў Аляксандр Барсякоў, начальнік ідэалагічнага аддзела Алена Раздуева, было камфортна і ўтульна. Завяршыла ж гэта казачнае «навагодняе плаванне»... рашэнне журы на чале з урачом-экспертам райбальніцы Наталляй Дзмітрыенка. Паводле яго вердыкту, і дасталася перамога Вользе Ходасавай. Кампанію шчаслівай уладальніцы тытула «Каралева Зіма» сярод мацнейшых склалі Першая і Другая віцэ-міс — адпаведна медработнікі Вікторыя Салаўёва і Наталля Сараева.
— Пасля заканчэння Гомельскага медыцынскага каледжа чатыры гады таму Вольга Ходасава прыйшла працаваць у педыятрычнае аддзяленне райбальніцы, — распавядае галоўны ўрач медустановы Надзея Белаглазава. — Асвойвала практычныя навыкі лячэння дзяцей і іх маці старанна, з асаблівым запалам. Адозвы аб працы маладога спецыяліста толькі добрыя. Не забылася яна і пра выкананне свайго мацярынскага прызначэння — зараз разам з мужам выхоўваюць дачку, трохгадовую Лізавету. А ў мінулым годзе Вольга змяніла «профіль»: пераведзена ў афтальмалагічнае аддзяленне. І тут таксама зарэкамендавала сябе найлепшым чынам. Да ўсіх пацыентаў у яе падыход універсальны — з усмешкай і добрым словам…
Да кароны пераможцы конкурсу адміністрацыяй райбальніцы далучана салідная грашовая прэмія, матэрыяльна заахвочаны і астатнія ўдзельніцы конкурсу. Паводле слоў Надзеі Белаглазавай, дастойна ацэнены старанне і творчасць медработнікаў, якія актыўна ўдзельнічалі ў навагоднім упрыгожванні медыцынскіх устаноў раёна: з фонду эканоміі аплаты працы на прэміраванне іх накіравана 16 мільёнаў рублёў.
