— 7390 білетаў! Змялі ўсё за два тыдні. Дзякуй, краіна! — выказаў радасць на сваёй старонцы ў Facebook Аляксандр Саладуха пасля таго, як стала вядома пра продаж усіх білетаў на яго канцэрт.
Пад глядацкія месцы адвялі 12 сектароў. Можна было б і больш — адноўлены стадыён разлічаны на 22 тысячы гледачоў. Аднак Аляксандр Саладуха заяўляе, што прывык працаваць тварам да аўдыторыі. І дадае: 7390 — гэта пяць канцэртных залаў «Мінск» і амаль тры Палацы Рэспублікі.
Мяркуецца, на стадыёне «Дынама» спявак выканае не толькі ўсім вядомыя хіты, але і свежыя кампазіцыі, тым больш што за два месяцы да канцэрта ўбачыў свет яго 12 сольны альбом «Новае і лепшае». Напэўна, не абыдзецца і без эксперыментаў. Аляксандр Саладуха ўжо здзіўляў крыламі матылька, вобразам купідона, пародыяй на кліп Ягора Крыда і Філіпа Кіркорава «Цвет настроения черный» і гэтак далей. Намякае на нестандартнае выступленне Саладухі 1 мая і канцэртная афіша — у старажытна-грэчаскай стылістыцы.