У канцы мінулага года адбылося аб’яднанне КСУП «Веляцін» і ААТ «Хойніцкі Аграсэрвіс» — цяпер гаспадарка называецца «Веляцін Агра». Першая сумесная сяўба веляцінскіх і аграсэрвісаўскіх працаўнікоў праходзіць зладжана.
— Пасля аб’яднання не адчуваецца нейкага дзялення. Мы тут усе свае, — каменціруе механізатар Віктар Сяргеенка (на здымку). — Разумеем, што далучэнне праводзілася выключна ў інтарэсах працаўнікоў. Гэты саюз павінен несці эканамічную выгаду. КСУП «Веляцін» паступова павялічвае пагалоўе буйной рагатай жывёлы, адпаведна, яму патрэбныя дадатковыя сельгасугоддзі. А «Хойніцкаму Аграсэрвісу» не хапала тэхналагічных магчымасцей.
Дарэчы, кіраўніцтва і спецыялісты гаспадарак не сталі чакаць афіцыйнага далучэння і летась распрацоўвалі планы, рабілі задзел ужо на гэты год. Многа амбіцыйных мэт і ў новага маладога дырэктара КСУП «Аравічы» Рамана Уса:
— Для мяне галоўнае — дабрабыт людей. А ён залежыць у тым ліку і ад ураджаю. Таму нам усім варта пастарацца. Вядома, пасяўная кампанія — гэта не толькі непасрэдна сяўба, але і цэлы комплекс работ: падрыхтоўка глебы, унясенне ў яе мінеральных і арганічных угнаенняў. І тут мы адчуваем вельмі моцную дзяржаўную падтрымку. Да прыкладу, у рамках дзяржпраграмы ліквідацыі наступстваў аварыі на Чарнобыльскай АЭС распрацаваны комплекс ахоўных мер, якія забяспечваюць вытворчасць нарматыўна чыстай прадукцыі на такіх землях. Уносяцца дадатковыя падвойныя нормы фосфарных і калійных угнаенняў, праводзіцца вапнаванне глеб. І гэта вельмі важна. Гектары, адведзеныя пад яравую сяўбу, старанна апрацоўваюць і засяваюць нашы лепшыя механізатары. У ліку першых — Яўген Радзевіч і Уладзімір Гарашчанка.
— У нашых «Аравічах» 500 гектараў адведзены пад раннія збожжавыя, — расказвае Яўген. — Як толькі вывеў на поле сеялку ў апошнія дні сакавіка, адразу стараўся задаць высокі тэмп пасяўной. Магчыма, гэта ўжо заезджаная фраза, але нельга губляць каштоўны час. Таму працую з раніцы і да позняга вечара.
Механізатар КСУП «Аравічы» Яўген Радзевіч на сеялцы.Адчуваецца клопат аб працаўніках з боку кіраўніцтва. Гарачае харчаванне, аператыўная дапамога ў выпадку дробных паломак і наогул простыя падбадзёрваючыя словы. Таму настрой выдатны.
Безумоўна, цяпер самая абмяркоўваемая тэма ў вяскоўцаў — гэта надвор’е. Хаця і кажуць, што не трэба спісваць усё на нябесную канцылярыю, аднак ёй жа не пакамандуеш. Аграрыі манітораць метэасайты і спадзяюцца на добры прагноз.
Механізатар КСУП «Аравічы» Уладзімір Гарашчанка на падрыхтоўцы глебы.Між тым менавіта дзякуючы змяненню клімату ў апошнія гады ў рэгіёне складваюцца выдатныя ўмовы для вырошчвання кукурузы. Яе сяўба на чарзе.
Глебу на плошчах, адведзеных пад царыцу палёў, у КСУП імя І. П. Мележа рыхтуюць Дзмітрый Нікрашэвіч і Андрэй Касцючэнка.
Механізатар КСУП імя І. П. Мележа Дзмітрый Нікрашэвіч на падрыхтоўцы глебы.— Для мяне гэта чацвёртая пасяўная, асаблівых складанасцей не ўзнікае. Люблю зямлю і сваю справу. Працаваць даводзіцца хутка, вобразна кажучы, даганяем познюю вясну. Пры гэтым памятаем, што галоўнае — якасць, — зазначыў Дзмітрый. — Мае калегі, якія цяпер закладваюць аснову будучага ўраджаю, таксама вельмі стараюцца — раннімі збожжавымі засяваюцца апошнія гектары.
Механізатар КСУП імя І. П. Мележа Андрэй Касцючэнка на падрыхтоўцы глебы.Аварыя на ЧАЭС аказала моцны ўплыў на развіццё ўсіх сфер жыцця Хойніцкага раёна, сельскай гаспадаркі ў прыватнасці. Аднак час стэрэатыпаў, кажуць тутэйшыя, ужо сышоў. Тут памятаюць пра мінулае, але жывуць будучыняй. Гадуюць дзяцей і сеюць хлеб.
Наталля РЭВЯКА
Фото аўтара
