Аператар машыннага даення Таццяна СУПРАНЁНАК і настаўніца Удзелаўскай СШ Галіна КУШНЯРЭВІЧ ля выбарчага ўчастка
Сярод выбаршчыкаў і работнікі мясцовай гаспадаркі УП “За Радзіму”, і педагогі, і пенсіянеры. Пра сябе адзначыў, што на ўчастак прыйшло нямала моладзі. Апошняе і нядзіўна, бо аграгарадок — адзін з прыгажэйшых і багацейшых у Глыбоцкім раёне. Тут летась сабралі на круг звыш 40 цэнтнераў зерня і надаілі ад каровы 4800 кілаграмаў малака. А ёсць прадукцыя — ёсць і добрая зарплата.
ВОСЬ апусціла бюлетэні ў урну прыгожая дзяўчына Таццяна Супранёнак — аператар машыннага даення на малочна-таварнай ферме “Міхальцы”. Пра сябе гаворыць сціпла:
— Сама — з тутэйшых. Закончыла Лужаснянскі тэхнікум па спецыяльнасці ветфельчар. У маёй групе звыш паўсотні кароў. Ад кожнай у мінулым годзе надаіла па 5150 кілаграмаў малака. Сярэдняя зарплата звыш 700 рублёў у месяц. Ферма рэканструявана, створаны добрыя ўмовы для работы і адпачынку. Большасць маіх калег — равеснікі.
За Таццянай падыходзіць настаўніца мясцовай школы Галіна Кушнярэвіч. Для яе гэта не толькі першыя выбары ў мясцовыя Саветы, але і першы год работы пасля заканчэння навучальнай установы. Падзялілася навінамі: ў школе пабудавана сталовая, набыты аўтобус.
Ганна Губская прыйшла на выбары з гадавалым дзіцём на руках:
— Жыву ў аграгарадку ў прыватызаваным доме. Падабаецца і жыллё, і людзі, і гаспадарка. Муж механізатар, работы хапае зімой і летам. Затое зарабляе на ўсю сям’ю. У нас чацвёра дзяцей. Старэйшай — дзевяць год, а малодшаму — адзін. З ім я цяпер і знаходжуся ў дэкрэтным адпачынку, а дагэтуль працавала поварам у сталовай. Атрымліваю на Мацвея бясплатна адраснае дзіцячае харчаванне. А яшчэ на яго адкрыты рахунак у банку на дзіцячы капітал, і ў васемнаццаць год сын зможа атрымаць даволі круглую суму. Як тут не быць удзячнай тым, хто клапоціцца пра простага чалавека. І дэпутатам таксама.
ЗВЫШ чвэрці веку старшынёй Удзелаўскага сельвыканкама працуе Віктар Карман. Гэта ён сумесна з вядомым святаром Ёзасам Булькам узнаўлялі вёску Мосар і тутэйшы касцёл, паглядзець які цяпер едуць турысты з усёй краіны і замежжа.
Але ж не толькі адзін паказальны Мосар. На тэрыторыі Савета 35 малых і вялікіх вёсак, і ў кожнай усё даведзена да ладу. І нездарма летась Удзелаўскі сельсавет стаў прызёрам рэспубліканскага конкурсу па добраўпарадкаванні і санітарнаму стану населеных пунктаў, за што атрымаў прэмію ў 800 базавых велічынь, на якую пабудаваў 3 дзіцячыя пляцоўкі ў аграгарадку і набыў для школы трэнажор за 2300 рублёў.
Вядома, дапамагаюць шэфы арганізацый горада і раёна, якія па распараджэнню старшыні Глыбоцкага райвыканкама Алега Морхата замацаваны за населенымі пунктамі. Аднак ва Удзелаўскім сельсавеце галоўную “скрыпку” іграюць усё-такі дэпутаты, іх актыў, якія, дапамагаюць наводзіць парадак на зямлі, апрацоўваць людскія агароды і многае іншае.
І, напэўна, нездарма некалькіх дэпутатаў папярэдняга склікання вяскоўцы вылучылі кандыдатамі і на гэтыя выбары. Чаго ж мяняць іх, калі добра зарэкамендавалі сябе! За такіх вось трэба ісці і галасаваць!
saulich@bk.ru
Фота аўтара