Месца для сустрэч

Пры Рэспубліканскім цэнтры нацыянальных культур будуць працаваць курсы для тых, хто жадае вывучаць іўрыт
Пра гэта гаварылася пад час сустрэчы кіраўніка Рэспубліканскага цэнтра нацыянальных культур Міхаіла Рыбакова і дырэктара Ізраільскага культурнага цэнтра ў Беларусі Вольгі Паляшчук. Цяпер у памяшканнях РЦНК ёсць месца для работы нядзельных школ, рэпетыцый творчых гуртоў розных этнасуполак. З удзелам і пры дапамозе супрацоўнікаў цэнтра летась праведзены дзясяткі імпрэз. Памяшканні па вуліцы Чычэрына, 19, непадалёк ад Вялікага тэатра оперы і балета, — важная пляцоўка для міжкультурнага дыялогу прадстаўнікоў усіх народаў, што жывуць у Беларусі. Міхаіл Рыбакоў паказаў госці створаны пяць гадоў таму на мінскай тэлестудыі “Брэндстар” фільм “Шэсць стагоддзяў на беларускай зямлі” — пра гісторыю і сучаснае жыццё беларускай яўрэйскай абшчыны.
Ізраільскі культурны цэнтр у Беларусі разгарнуў работу з 1996 года, ён арганізуе папулярныя курсы сучаснага іўрыта для ўсіх жадаючых. Паводле папярэдняй дамоўленасці М.Рыбакова і В. Паляшчук, групы іўрыта цяпер змогуць працаваць і ў Рэспубліканскім цэнтры нацыянальных культур. Субяседнікі згадалі такі факт: Элізер Бен-Іегуда, “бацька сучаснага іўрыта”, нарадзіўся ў 1858 годзе ў вёсцы Лужкі Дзісненскага павета Віленскай губерні (цяпер Шаркаўшчынскі раён Віцебшчыны). Яго бюст устаноўлены летась пад час Дня беларускага пісьменства ў Глыбокім у гарадскім скверы.