Не раз даводзілася канстатаваць факты, калі структуры іншай формы ўласнасці пераманьвалі кадры са Стаўбцоўскага райспажыўтаварыства. На гэты раз мы маем адваротны выпадак. Ганна Шахнер, якую вы бачыце на здымку, пераехала працаваць у кандытарскі цэх райспажыўтаварыства з Гарадзеі, маючы там вопыт работы каля 20 гадоў. Больш таго, разам з ёю на працягу пяці апошніх гадоў ездзіць на працу з Гарадзеі ў Стоўбцы ўся яе брыгада ў складзе Вольгі Пачко, Наталлі Дубовік, Людмілы Кібень. Кандытары не бачаць у гэтым ніякіх праблем: чыгуначным транспартам вельмі зручна дабірацца — некалькі прыпынкаў на электрацягніку.
Кіраўніцтва аддзела грамадскага харчавання лічыць, што такія кадры — сапраўднае шанцаванне. Аб гэтым сведчаць і вынікі. Ганна Шахнер, як загадчыца кандытарскага цэха, імкнецца быць у пастаянным пошуку новых распрацовак. Дапамагае ў гэтым і ўдзел у розных выставах. Адметна, што стаўбцоўскія кандытары едуць туды не як пабочныя сузіральнікі, а як вытворцы, са сваёй прадукцыяй. На Міжнароднай выставе «Хлебная справа» быў прадстаўлены стаўбцоўскі каравай. Да слова тут будзе сказаць, што вялікім попытам у спажыўцоў карыстаецца велікодная выпечка кандытарскага цэха, велікодныя кулічы. На выставу-конкурс «Ласунак-2013» стаўбцоўскія кандытары прадставілі вялікую калекцыю тортаў з вельмі адметным упрыгажэннем і свае новыя пірагі.
Зразумела, што ў кандытарскай справе, як і ў любой іншай, патрэбна паспяваць за часам, шукаць інавацыі. І кандытарам неабходна самім развіваць свае ўменні, прыглядвацца да вопыту іншых. Для Ганны Шахнер у гэтым плане вельмі карыснай была напрыканцы мінулага года паездка па абмене вопытам па маршруце Рыга—Стакгольм—Хельсінкі—Талін у складзе прадстаўнікоў Белспажыўсаюза.
— Мы пабывалі, — дзеліцца ўражаннямі Ганна Валянцінаўна, — на хлебазаводах, хлебакамбінатах, у кандытарскіх цэхах, рэстаранах, кафэ. У Рызе, напрыклад, наведалі пякарню, дзе выпякаецца хлеб па старадаўніх рэцэптах. Вельмі смачны. У Фінляндыі сапраўдны культ хлеба. Хлеб у іх бездражджавы, вельмі высокай якасці. Рэалізуецца дзяржаўная праграма, дзецям з пачатковых класаў прывіваюць шаноўныя адносіны да хлеба. Сервіроўка стала, афармленне страў, кандытарскі дызайн — можна было ўсё сфатаграфаваць, занатаваць сабе. Вялікі інтарэс выклікалі розныя дэсерты з самых нечаканых інгрэдыентаў. Для нас гэта была сапраўдная школа, мы шмат чаго для сябе ўзялі. Паездка была карысная і тым, што ў дарозе мы мелі магчымасць абмяняцца вопытам са сваімі беларускімі калегамі.
Ганна Шахнер не адклала на доўгі час набытыя ўражанні. У кандытарскім цэху распрацаваны новыя віды пірагоў і тортаў з натуральнымі фруктовымі напаўняльнікамі, са сметанковым крэмам. Хоць прадукцыя з натуральных інгрэдыентаў і мае кароткія тэрміны рэалізацыі, але на яе знаходзяцца пакупнікі. А ў кафэ «Забава», якое размешчана пад адным дахам з кандытарскім цэхам, заўсёды можна атрымаць інфармацыю аб прадукцыі і набыць самыя свежыя вырабы.