Яшчэ адна карціна нашага суайчынніка, мастака Вячаслава Ігнаценкі папоўніла збор калекцыі Нацыянальнага мастацкага музея Малдовы
Гэта ўжо другая работа Вячаслава Ігнаценкі — ураджэнца Гомельскай вобласці, выпускніка Беларускай акадэміі мастацтваў, члена Саюза мастакоў Малдовы, намесніка кіраўніка Беларускай абшчыны ў Малдове — у калекцыі Нацыянальнага мастацкага музея Малдовы.
Набыты ў мастака твор у дар музею перадала генеральны дырэктар беларуска-малдаўскага прадпрыемства “Гандлёвы дом “Керамін—Кішынёў” Ганна Бабіна. У цырымоніі ўдзельнічалі прадстаўнікі пасольства Беларусі ў Малдове, Беларускай абшчыны Малдовы, калегі і сябры Вячаслава Ігнаценкі.
Ганна Бабіна адзначыла, што з радасцю перадае карціну мастака-беларуса ў галоўны мастацкі музей Малдовы. “Хацелася б, каб творчасць земляка была больш вядомай сярод малдаван”. Яна пажадала мастаку новых творчых поспехаў. А прадстаўнікі пасольства Беларусі ў Малдове выказалі ўдзячнасць Ганне Бабінай за працяг традыцый мецэнацтва.
Вячаслаў Ігнаценка на цырымоніі перадачы карціны ў музей не хаваў эмоцый, усхвалявана прызнаваўся: “Для кожнага мастака вельмі важная падзея ў жыцці, калі твор трапляе ў музей. Тады разумееш, што працуеш недарма, што ў творчасці ёсць сэнс. Ды і, шчыра кажучы, пасля таго, як карціна трапляе ў музей, стаўленне да мастака ўжо зусім іншае”. Творца адзначыў таксама, што мецэнаты былі заўсёды і ва ўсіх краінах. Яны набывалі карціны і дарылі іх музеям. Аднак апошнім часам такая дабрачыннасць – рэдкая з’ява. Вячаслаў Ігнаценка падзякаваў кіраўніку гандлёвага дома “Керамін—Кішынёў”, выказаў надзею, што яе ініцыятыву падтрымаюць іншыя прадпрымальнікі.
Раней у збор Нацыянальнага мастацкага музея Малдовы трапіла праца Вячаслава Ігнаценкі “Інтэрпаляцыя”. Яе 22 гады таму набыло на выставе Міністэрства культуры Малдовы. Па словах мастака, перададзеная сёння музею ў дар карціна “Гульня” выканана ў тым жа стылі.
Яшчэ Вячаслаў Ігнаценка расказваў, што з 1993 года ў яго прайшло больш за 30 персанальных выстаў, у тым ліку тры — за апошні год. Дзве карціны, якія былі прадстаўлены летась пад час Першага Фестывалю мастацтваў беларусаў свету ў Мінску, сталі уласнасцю Нацыянальнага мастацкага музея Беларусі. Дарэчы, яго творы ёсць і ў зборы Бендэрскай карціннай галерэі, у карцінных галерэях гарадоў Ільічоўск і Мікалаеў.
Даведка “ГР”. Вячаслаў Ігнаценка нарадзіўся ў вёсцы Пярэдзелка Лоеўскага раёна Гомельскай вобласці. Закончыў Беларускі тэатральна-мастацкі інстытут (цяпер Беларуская дзяржаўная акадэмія мастацтваў) у Мінску. З 1983 года жыве ў Малдове. У 1994 годзе мастак атрымаў першую прэмію за графічныя працы ў Таронта (Канада). Вячаслаў Ігнаценка — аўтар універсальнага стылю: у яго маляўнічых працах спалучаюцца рэалізм, імпрэсіянізм, дэкор, авангард. У апошні час робіць ілюстрацыі да кніг.
Кацярына Мядзведская
Маляўнічае спалучэнне разнастайных стыляў
Яшчэ адна карціна нашага суайчынніка, мастака Вячаслава Ігнаценкі папоўніла збор калекцыі Нацыянальнага мастацкага музея МалдовыГэта ўжо другая работа Вячаслава Ігнаценкі — ураджэнца Гомельскай вобласці, выпускніка Беларускай акадэміі мастацтваў, члена Саюза мастакоў Малдовы, намесніка кіраўніка Беларускай абшчыны ў Малдове — у калекцыі Нацыянальнага мастацкага музея Малдовы.Набыты ў мастака твор у дар музею перадала генеральны дырэктар беларуска-малдаўскага прадпрыемства “Гандлёвы дом “Керамін—Кішынёў” Ганна Бабіна. У цырымоніі ўдзельнічалі прадстаўнікі пасольства Беларусі ў Малдове, Беларускай абшчыны Малдовы, калегі і сябры Вячаслава Ігнаценкі.