У першы дзень мінскі аквапарк наведалі 500 чалавек.
— Каб пазбегнуць ажыятажу і вялікіх чэргаў ля горак, пакуль мы прадаём толькі 500 білетаў у дзень, — тлумачыць Аліна Змачынская, крэатыўны дырэктар прадпрыемства «Аква-Мінск». — Набыць іх можна выключна праз Інтэрнэт. Рабіць гэта лепш загадзя, бо, напрыклад, да серады ўжо ўсё раскуплена.
Сярод тых, хто прыходзіць у аквапарк, у асноўным сем’і з дзецьмі ад 8 да 16 гадоў.
— Учора наведвальнікі часта пыталі, чаму не працавала тая ці іншая горка, — працягвае спецыяліст. — Звязана гэта з ажыятажам ля некаторых з іх. Калі збіраецца шмат людзей, для падтрымання бяспекі мы перанакіроўваем сюды дадатковых выратавальнікаў з менш папулярных атракцыёнаў, якія на гэты час закрываем. Адзначу, мера гэта часовая.
Пасля 20 мая ў аквапарку плануюць правесці шоу-прэзентацыю, пасля чаго білеты сюды будуць прадавацца ў поўным аб’ёме і не толькі праз Інтэрнэт.
Фота: Юрый МАЗАЛЕЎСКІ