Гартуючы дух і цела

Усебеларускі лёгкаатлетычны крос збірае штогод сотні ўдзельнікаў

Фінал Усебеларускага лёгкаатлетычнага кросу на прызы газеты “Советская Белоруссия” па традыцыі ладзіцца напярэдадні Дня Перамогі. Як вядома, бег — самы даступным сродак для трэніровак духу і цела: не патрэбны дарагія спортзбудаванні, амуніцыя. І з кожным годам павялічваецца лік аматараў бегу ў Беларусі. Вось і сёлета траса кросу праходзіла па маляўнічых мясцінах у цэнтры сталіцы, непадалёк ад мемарыяла “Мінск — горад-герой”. Для ўдзельнікаў спаборніцтваў і гледачоў была арганізавана насычаная канцэртная праграма, што спрыяла святочнаму настрою.
Прадстаўнікі розных рэгіёнаў краіны ўдзельнічалі ў забегах на дыстанцыях ад аднаго да шасці кіламетраў, у розных узроставых групах. На трасе было шмат хвалюючых момантаў, часам лідары зменьваліся, і літаральна да апошняй секунды была інтрыга: хто ўсё ж стане пераможцам? Інфармацыю пра пераможцаў, фотаздымкі з дыстанцый, а таксама пратаколы спаборніцтваў можна знайсці ў інтэрнэце. У камандным заліку перамогу ў чарговы раз атрымала каманда Брэсцкай вобласці, на другім месцы бегуны Віцебшчыны, на трэцім — Магілёўшчыны.

Іван Іванаў