Чаму драпежнікі ўсё часцей нападаюць на людзей

Паляўнічыя працягваюць шукаць ваўка, які напаў на двух мужчын у гарад­скім пасёлку Камарын Бра­гінскага раёна.

Буйны драпежнік завітаў у пасёлак вечарам 2 студзеня. Спачатку ён схапіў за руку мясцовага жыхара, які чакаў транспарт на аўтобусным прыпынку.

— І мноства людзей не спалохаўся! – дзівіцца Віктар. – Вынырнуў з цемры – было каля шасці вечара, схапіў мяне за руку і пацягнуў за сабой. Неяк удалося адбіцца. А звер буйны, недзе мне па пояс. 

Сур’ёзных раненняў Віктар не атрымаў – толькі драпіну ад зубоў. Тым не менш яму ўвялі вакцыну супраць шаленства.

А праз сорак хвілін воўк з’явіўся на аўтазаправачнай станцыі на ўскрайку пасёлка. Спачатку ён перавярнуў бак, а потым кінуўся на веласіпедыста, які пад’ехаў да гандлёвай кропкі. Той здолеў падставіць руку, а тоўстую куртку воўк не пракусіў.

Дарэчы, карціну нападу зафіксавала камера відэаназірання. Дзякуючы ёй і ўдалося ўстанавіць, што гэта быў дакладна воўк, а не, скажам, вялікі сабака.

Літаральна праз паўгадзіны ў Камарын прыехалі прадстаўнікі Беларускага таварыства паляўнічых і рыбаловаў, егеры, а таксама супрацоўнікі міліцыі. Да позняга вечара яны прачэсвалі наваколле, але не знайшлі нават слядоў драпежніка. 

— Ваўкі вельмі асцярожныя, — зазначыў Раман Галезнік, паляўніцтвазнавец Брагінскай раённай арганізацыйнай структуры РДАТ БТПР. – Калі ён не шалёны, то да чалавека і блізка не падыдзе. Але наконт гэтага звера ёсць сумненні – хутчэй за ўсё, ён здаровы, інакш напады працягваліся б. Прайшло ўжо тры дні, а яго не відаць і не чуваць.

Ёсць здагадкі, што воўк рушыў за ўкраінскую мяжу, якая зусім недалёка, або ў Палескі радыяцыйна-экалагічны запа­веднік. Тым не менш пошукі працягваюцца. З-за адсутнасці снегу выследзіць драпежніка немагчыма, але штодзень не менш за 8 паляўнічых аб’язджаюць Камарын і бліжэйшыя населеныя пункты.

sb_gomel@mail.ru

nevmer@mail.ru