Мінулы тыдзень работы ўрада прайшоў пад знакам дзелавога супрацоўніцтва
Завяршэнне мінулага тыдня ў дзейнасці ўрада прайшло пад знакам Міжнароднага дзелавога форуму ў Мінску, які, па прызнанні прэм’ер-міністра Беларусі Міхаіла Мясніковіча, пацвердзіў актывізацыю супрацоўніцтва дзелавых колаў нашай краіны з калегамі з Еўрапейскага саюза. Актыўна развіваецца супрацоўніцтва па лініі Беларусь — Германія і Беларусь — Польшча, эфектыўным інструментам, які садзейнічае актывізацыі гандлю і росту замежных інвестыцый, стаў «Дзелавы савет Беларусь — ЕС». Не выпадкова ў гэтым годзе ўрад выконвае задачу па дасягненні рэкорднага тавараабароту ў гандлі з краінамі Еўрапейскага саюза — каля 25 млрд. долараў. Пры гэтым інвестыцыйны партфель міжнародных фінансавых арганізацый, у тым ліку Сусветнага банка і Еўрапейскага банка рэканструкцыі і развіцця, цяпер складае для беларусаў каля 2 млрд. долараў.
Яшчэ адно мерапрыемства, якое прайшло пад заслону года, з’яўляецца яркім сведчаннем таго, што актыўна развіваецца дзелавое інтэграцыйнае супрацоўніцтва і на ўсходнім кірунку. Так, у Магілёве завяршылася пасяджэнне рабочай групы Савета дзелавога супрацоўніцтва Рэспублікі Беларусь і Санкт-Пецярбурга.
Намеснік прэм’ер-міністра Міхаіл Русы, які прымаў удзел у яго працы, адзначыў, што ў аснове супрацоўніцтва нашай краіны з дзелавым Санкт-Пецярбургам павінна знаходзіцца стварэнне сумесных інтэграваных вытворчасцей. Тавары з беларускай маркай адрозніваюцца высокай якасцю і добра знаёмыя пецярбуржцам, у тым ліку дзякуючы традыцыйнаму кірмашоваму гандлю.
Віцэ-губернатар Санкт-Пецярбурга Сяргей Козыраў звярнуў увагу ўдзельнікаў Савета дзелавога супрацоўніцтва на тую акалічнасць, што кожны год тавараабарот нашай краіны з паўночнай сталіцай Расіі прырастае на 15—17 працэнтаў.
Некалькі гадоў таму ён складаў 93 млн. долараў, а за няпоўны бягучы год перавысіў 110 млн. долараў. Важкі ўклад у павелічэнне тавараабароту ўнесла магілёўскае ліфтабудаўнічае прадпрыемства. З горада на Дняпры для патрэб жыллёвага будаўніцтва мегаполіса сёлета пастаўлена больш за адну тысячу сучасных ліфтаў. Губернатар Магілёўшчыны Пётр Руднік перакананы, што нарасціць продаж айчыннай прадукцыі ў паўночным кірунку рэальна — у першую чаргу гэта тычыцца рэгіянальных прадпрыемстваў нафтахімічнай і аграпрамысловай галін. Іх прадукцыя зараз запатрабавана ў шэрагу рэгіёнаў Расійскай Федэрацыі.
Па выніках пасяджэння Савета дзелавога супрацоўніцтва бакі падпісалі пратакол, у якім пацверджана гатоўнасць нарошчвання вытворча-кааперацыйных сувязей, рэалізацыі сумесных навукова-тэхнічных і інавацыйных праектаў, а таксама развіцця інвестыцыйнага супрацоўніцтва.
