Лічыцца, што пост устаноўлены ў гонар святых Пятра і Паўла ў часы Канстанціна Вялікага. У першыя ж хрысціянскія стагоддзі пост ніяк не звязваўся з імёнамі апосталаў, а лічыўся кампенсатарным: тыя, хто не змог пасціцца перад Вялікаднем, пасціліся пасля велікодных святаў, г. зн. пасля Тройцы.
Пост гэты лічыцца “нястрогім” — можна есці рыбу і морапрадукты. Выключэнне складаюць панядзелак, серада і пятніца і яшчэ так званыя “нярыбныя” дні — 27 і 29 чэрвеня, 1, 6 і 8 ліпеня. Таксама ў час посту нельга есці яблыкі.
У народзе Пятроўскі пост звалі Пятроўка-галадоўка: на пачатку лета мінулагодняга ўраджаю ўжо мала засталося, а новы яшчэ толькі паспявае. А яшчэ іменна пра гэты пост нарадзілася прымаўка: “Чакай Пятра — сыр з’ясі”. Маўляў, усяму свой час, калі трэба, можна і пацярпець.
