У кніжнай серыі “Адрасы Беларусі ў свеце” выйшла цікавае выданне пра беларуска-ўкраінскія культурныя стасункі

Нядаўна ў Выдавецкім доме “Звязда” пабачыла свет кніга “Светлымі дарогамі братэрства” — трэцяя ў праекце “Адрасы Беларусі ў свеце”. Там ёсць аповед пра беларуска-ўкраінскае яднанне ў розных яго праявах, пра тое, дзе жылі-працавалі ўраджэнцы Беларусі ва Украіне, якую ўвагу праяўляюць украінцы да братняй культуры і самой Беларусі. У кнізе ёсць гутаркі, дыялогі з украінскімі пісьменнікамі розных пакаленняў: Яраславай Паўлычкай, Аляксеем Кананенкам, Ігарам Січавіком, Галінай Тарасюк, Віктарам Баранавым...


Лаўрэат Дзяржпрэміі Беларусі, вядомы творца Алесь Марціновіч падае нарысы пра беларусаў, ураджэнцаў Беларусі Міхаіла Слёзку, Мітрафана Доўнара-Запольскага, Сяргея Палуяна, Браніслава Залескага, Іосіфа Гузікава, Еву Фялінскую, Іосіфа Сакалоўскага, Мендэле Мойхера-Сфорына, чые лёсы спраўдзіліся ў Кіеве, Адэсе, Валыні ды іншых мясцінах Украіны. Цікава чытаць пра “беларускія літаратурныя адрасы” ў Кіеве, Харкаве, Адэсе, Львове, публікуюцца вершы ўкраінскіх паэтаў пра Беларусь. Перакладчыкамі песеннага ліставання ўкраінскіх паэтаў з беларускай старонкай выступаюць Васіль Зуёнак, Янка Сіпакоў, Уладзімір Караткевіч, Вячаслаў Рагойша, Сяргей Панізьнік.

Голас Радзімы № 4 (3556), чацвер, 25 студзеня, 2018 у PDF