Ігар Міхайлавіч зняў нямала вядомых карцін, сярод іх — “Іван Макаравіч”, “Расклад на паслязаўтра”, “Па сакрэце ўсяму свету”, “Плач перапёлкі”. Але самым народным яго фільмам, напэўна, былі і застаюцца “Белыя росы” па сцэнарыі драматурга Аляксея Дударава. Нават на YouTube ў гэтага фільма каля 4 мільёнаў праглядаў, як у кліпаў эстрадных суперзорак! А за першы год яго паглядзела больш за 60 мільёнаў гледачоў. Такі вось наш загадкавы кінематаграфічны феномен. Горка, што на мінулым тыдні пайшоў з жыцця Мікалай Карачанцаў, які выканаў у “Белых росах” адну з галоўных роляў.
Нядаўна Дудараў сустракаўся з ветэранамі, якія знаходзяцца на лячэнні ў Рэспубліканскім клінічным шпіталі інвалідаў Вялікай Айчыннай вайны імя П.М. Машэрава ў Бараўлянах, і супрацоўнікамі гэтай медыцынскай установы. Аляксей Ануфрыевіч успомніў некаторыя моманты са здымак культавай стужкі і паспрабаваў разгадаць яе таямніцу. А я зноў зразумеў: без гумару ў кіно — нікуды. У добрых фільмах смех і слёзы заўсёды побач.
— Неяк зноў паказвалі па тэлебачанні “Белыя росы”, і я вырашыў паглядзець, бо даўно не бачыў, — кажа Дудараў. — І шмат чаго ўспомнілася. Пра працу з Ігарам Дабралюбавым. Пра тое, як мы рабілі кіно...
Кадр з фільма “Белыя росы”
ПАМЯЦЬ
Акцёр Мікалай Карачанцаў пайшоў з жыцця на мінулым тыдні — 26 кастрычніка, за дзень да свайго 74-годдзя. Ён памёр у рэанімацыі 62-й бальніцы ў Маскве.Памятаеце адну з апошніх сцэн — размову пасля вяселля? Бацька і сын сядзяць. Бацька кажа сыну: “Ідзі дамоў, да жонкі”. І прыходзіць сябрук, герой Барыса Новікава. Такой сцэны ў сцэнарыі не было — гэта імправізацыя Барыса Кузьміча і ён прасіў Дабралюбава яе зняць. Той адмаўляўся да апошняга, а пасля не вытрымаў і сказаў аператару Рыгору Масальскаму: “Уключы ты камеру, хай робіць, што хоча, потым усё роўна выражам”. І герой Новікава кажа ў гэтай сцэне: “Вось, здавалася б, усё добра, а ўвогуле — прападзі ты ўсё пропадам: і цешча, і Валет, і гэтыя далікатэсы...” І пайшоў у ноч з талеркай. Здаецца, нічога асаблівага ў гэтай сцэне няма, але як таленавіты акцёр некалькімі фразамі паглыбіў вобраз і нават, на мой погляд, сутнасць стужкі. Ён нёс “далікатэсы” сабаку Валету, які лаяў на балконе. Але яго герой інтуітыўна разумее, што з імі адбылася трагедыя. Валет на балконе жыць не будзе, як яго ні кармі і як яго ні выгулівай. Нават у сабакі з пераездам адбылася трагедыя, што ж тут казаць пра людзей. У Белыя росы вяртання няма. Але і горад — не іх зямля. Хто ў гэтым вінаваты? Ніхто. Як гэтага пазбегнуць? Ніяк не пазбегнеш.
Галівуд гэта ці не? Здаецца, не. Адбываецца там нешта неверагоднае? Здаецца, не. Але самае галоўнае, што там ёсць, гэта тое, што кожны дзень здараецца з намі ўсімі: кожны дзень мы ўсе нешта губляем. Нешта пакідаем, пераходзім у тую ці іншую якасць.
Калі я пісаў гэты сцэнарый, мне было 32 гады. Я не быў тады такі разумны і такі сівы, але, мабыць, нешта таксама інтуітыўна адчуваў пра гэты разрыў са сваімі каранямі і вёскай, які непазбежна надыходзіць. Мянялася матрыца жыцця і часу.
Часта пытаюцца: ты з некага канкрэтнага спісваў вобразы? Так, нешта ў Ходаса ёсць ад майго бацькі. І цешчына настойка была. І словы пра воўчыя ягады я ад яго чуў. Як гэта пачалося? Калі я прачытаў апавяданні Васіля Шукшына, я ўбачыў у яго чудзіках сваіх суседзяў, нават цікавейшых, чым у яго. Мне захацелася не паспрачацца з Шукшыным, але таксама выказацца пра іх. Шукшын паказаў усім, што можна пісаць пра вёску неяк па-новаму, з новым адчуваннем жыцця, з прагай да жыцця, з гумарам, з гэтай амаль чэхаўскай увагай да дэталяў. На жаль, шляхі нашы ў рэальным жыцці не перасякліся, але я лічу яго сваім хросным бацькам у літаратуры. Нават сёння час ад часу адкрываю яго апавяданні і чытаю. Яны, дарэчы, былі аднакурснікамі з Дабралюбавым.
Калі я пісаў, то Ходасам бачыў Івана Лапікава. Але Усевалад Санаеў сыграў яго па-свойму. І геніяльна сыграў. Яго фінальную сцэну звяртання да сонца я без слёз глядзець не магу. І ўсім раю — часцей звяртацца да яго і дзякаваць за жыццё!
Вельмі дакладнае пападанне таксама з Карачанцавым і астатнімі героямі. Нарэшце ўспомніў, што Мікалай заўсёды вельмі баяўся вышыні. А там трэба было сядзець на дрэве, у бусліным гняздзе. І калі прааналізаваць гэты эпізод, вы пабачыце, што ён імкнецца не глядзець уніз, а толькі перад сабой. Таму што яму было вельмі боязна. Мікалай быў чысты, добры, светлы чалавек. На маю думку, ён нічога ніколі не іграў. І ў тэатры, і на экране быў самім сабой. Тым, у каго з’явіліся слёзы пасля навіны пра гэту страту, — трэба іх змахнуць. Змахнуць і пакланіцца да зямлі. Вечная памяць Карачанцаву, Дабралюбаву, Санаеву, Новікаву... Мне пашчасціла, што ў маім жыцці адбыліся сустрэчы з такімі таленавітамі асобамі.
pepel@sb.by
ДАВЕДКА “НГ”
Народны артыст БССР Ігар Дабралюбаў нарадзіўся 22 кастрычніка 1933 года ў Новасібірску. Скончыў факультэт журналістыкі БДУ і рэжысёрскі факультэт Усесаюзнага дзяржаўнага інстытута кінематаграфіі. Яго настаўнікам быў Міхаіл Ромм, а аднакурснікамі — Андрэй Таркоўскі і Васіль Шукшын. За 30 гадоў рэжысёрскай кар’еры Ігар Міхайлавіч зняў 18 фільмаў. У 2008 годзе Вярхоўны суд Беларусі прызнаў за кінастудыяй “Беларусьфільм” правы на стужкі Дабралюбава. Згодна з гэтым рашэннем, ні ён, ні яго нашчадкі не атрымліваюць аўтарскіх узнагарод за пракат і продаж фільмаў.