26 мая ў парку паміж завулкам Клумава і водным каналам у Партызанскім раёне Мінска пройдуць першыя работы па стварэнні парку — можна будзе ўбачыць першыя незвычайныя расліны, якія прадаставіў Цэнтральны батанічны сад НАН. А пакуль у Цэнтры сацыяльнага абслугоўвання насельніцтва раёна абмяркоўваюць праект: што з'явіцца ў парку ў першую чаргу, што ўстановяць пасля. Старшыня Мінскай арганізацыі Беларускага таварыства Чырвонага Крыжа Алена Фадзеева паказвае праект і нам:
— Месца для незвычайнага парку выбрана невыпадкова. Гэты раён даволі стары. Няма новабудоўляў, і жыве тут шмат людзей ва ўзросце — каля 25 тысяч атрымальнікаў пенсіі. Тут знаходзіцца Цэнтр сацыяльнага абслугоўвання насельніцтва Партызанскага раёна, у які ходзяць на заняткі людзі пенсіённага ўзросту, з інваліднасцю. Непадалёк — аддзяленне Чырвонага Крыжа, які і з’яўляецца ініцыятарам ідэі.
Алена ФАДЗЕЕВА (злева): «Дзякуй усім тым, хто адгукаецца і прапануе сваю дапамогу ў развіцці парку»Задумка стварыць парк, у якім людзі любога ўзросту, любых магчымасцей будуць не толькі адпачываць на лавачцы, але і самі ўносіць уклад у яго ўпрыгожванне і развіццё, з’явілася ў снежні.
— Многія на летні сезон застаюцца ў Мінску. Чым заняцца ў каменных джунглях? Наш парк, дзе будуць расліны з самымі рознымі водарамі, колерамі, якія можна даглядаць, — добрая ідэя для занятасці, — кажа дырэктар ДУ «Тэрытарыяльны цэнтр сацыяльнага абслугоўвання насельніцтва Партызанскага раёна Мінска» Алена Канаплёва. — Вельмі важна: мы хочам стварыць клумбы самых розных памераў. Неабавязкова будзе нагінацца да зямлі. Вялікія клумбы дадуць магчымасць і чалавеку на інваліднай калясцы даглядаць духмяныя лячэбныя травы і кветкі.
Перад намі праект, дзе на кожнай старонцы намаляваны магчымыя рашэнні для парку. Вось будзе сэнсарны сад «5 пачуццяў», дзе можна дакрануцца, панюхаць самыя розныя расліны, а не толькі простыя цюльпаны. Вось зона з прагулачнымі сэнсарнымі дарожкамі, выкананымі з шышак, пяску, жвіру. А вось зона гульняў, дзе хутка будуць усталяваны велізарныя шахматы. Будзе і пляцоўка для размяшчэння спартыўных трэнажораў, настольных гульняў, для ціхага адпачынку ў альтанках, дзіцячая зона і сцэна для правядзення канцэртаў, мерапрыемстваў. Але на ўсё патрэбныя сродкі. Дзе іх узяць на такую ініцыятыву?
— Мы шукалі спонсараў і партнёраў. Першыя сродкі атрымалі, прайшоўшы ў фінал конкурсу сацыяльных праектаў Social Weekend. Нас там вельмі падтрымалі і выдзелілі 4100 рублёў. На іх купілі 4 лаўкі, 2 клумбы, высокія шахматы. Апошнія, дарэчы, наша фішка. Такія мы ўсе бачылі на вялікіх мерапрыемствах. Але ў парку, у цені дрэў, у вольным доступе — не. А ў нас такое будзе, — працягвае Алена Фадзеева. — Усе інструменты для працы, гульняў і адпачынку будуць знаходзіцца прама насупраць парку — у цэнтры абслугоўвання насельніцтва, што вельмі зручна.
Партнёрамі такога незвычайнага праекта сталі Батанічны сад НАН, падтрымалі ідэю адміністрацыя раёна і архітэктурна-будаўнічы каледж, які знаходзіцца на яго тэрыторыі. Студэнты і выкладчыкі распрацавалі праект, які з'яўляецца для стваральнікаў парку ідэальным. Незвычайныя клумбы, лавачкі, дызайнерскія рашэнні ўсёй зоны — на малюнку выглядае ўражліва: многае ўзялі з вопыту Даніі.
Крочым з Аленай Фадзеевай на месца, дзе шпацыруюць галоўныя «работнікі» будучага парку — падцягнутыя, сімпатычныя дамы ва ўзросце ад 65 да 78 гадоў. Яны першыя падахвоціліся дапамагаць тут:
— Вельмі важна, каб усе падлучаліся да стварэння прыгожага вакол сябе. Парк — праект доўгаіграючы. Глядзіце, вунь там знаходзіцца загс, а маладыя нярэдка ля воднага канала фатаграфуюцца. Уявіце, калі ў нас будуць тут квітнець самыя незвычайныя расліны, а яшчэ прыемна пахнуць рамонак, мята і іншае, што можна сабраць для гарбаты, — будзе яшчэ лепш! Тут вам і ароматэрапія будзе, і ёга, і пілатэс. Можна арганізоўваць канцэрты і выставы, гуляць з унукамі і дзецьмі… Людзі з дэменцыяй і тыя, хто перанёс інсульт ці мае якія-небудзь фізічныя праблемы, таксама змогуць уносіць свой уклад і пры гэтым мець зносіны, адпачываць і развівацца.
У парку таксама будуць актыўныя зоны з гульнямі
— Людзі кажуць: лепш давай, чым бяры. Мы разумеем, што ніколі нельга сумаваць, трэба жыць і дапамагаць адзін аднаму. Калі даведаліся, што зможам стварыць парк, мы ўсе напоўніліся вялікай радасцю!
Другая паўтарае:
— Напэўна, Гасподзь і трымае нас у форме, каб мы маглі ўнесці свой уклад у развіццё горада. Сваімі сіламі.
А трэцяя дадае:
— Я, напрыклад, раней працавала ў архітэктурным аддзеле — маю ўяўленне пра многае, таму сказала, што палепшыць. І так кожны. Зусім хутка, калі пачнуцца работы, мы з задавальненнем прывядзем сваіх унукаў сюды, пакажам, як можна ствараць нешта сваімі рукамі. А потым у іншых гарадах краіны раскажам пра свой вопыт і, галоўнае, аб актыўным даўгалецці. Добрым трэба дзяліцца.
alinakasel@gmail.com
Фота СЯРГЕЯ ЛАЗЮКА
