Тэатральны падарунак ветэранам

Акцёры Нацыянальнага акадэмічнага драмтэатра імя Максіма Горкага да юбілею Вялікай Перамогі падрыхтавалі арыгінальную канцэртную праграму “Поле памяці”.

У Рускім тэатры з павагай ставяцца да ваеннай тэматыкі, рэалізуюць да юбілеяў Перамогі адметныя праекты. Напрыклад, спектакль “Знак бяды” паводле аповесці Васіля Быкава ў 1985-м паставіў Валерый Маслюк. “Вяршыняй творчасці Вольгі Клебановіч стала роля Сцепаніды,” — сцвярджаюць тэатразнаўцы. Артыстка, як і яе партнёр па спектаклі Аляксандр Ткачонак (ён выконваў ролю Петрака), стала ў 1986-м лаўрэатам Дзяржаўнай прэміі БССР. А напярэдадні 70-й гадавіны Перамогі рэжысёр-пастаноўшчык Валянціна Еранькова і музычны кіраўнік, кампазітар Аляксей Еранькоў паставілі тэматычную канцэртную праграму. У яе ўвайшлі ўрыўкі са спектакляў пра вайну, адпаведныя музычныя кампазіцыі з рэпертуару Уладзіміра Мулявіна, вершы і песні. У праграме ўдзельнічалі пераважна маладыя артысты тэатра.

Стваральнікі праграмы казалі: гэта падарунак ветэранам, даніна памяці і павагі ўсім, хто змагаўся за Перамогу. У фае можна было паглядзець фотаздымкі ваенных гадоў, лісты і тэлеграмы салдат. У двары тэатра гасцей частавалі кашай, прыгатаванай на палявой кухні.