Вароты на тэрыторыю былой сядзібы Солтанаў адкрывае протаіерэй Дзмітрый Сёмуха. Пакуль ідзём, пытаюся ў святара пра яго сімвалічнае прозвішча. Менавіта Сёмухай беларусы называюць свята Тройцы. Бацюшка адказвае, што і храм, у якім ён настаяцель, носіць імя Святой Тройцы, і пачынаў служыць у ім таксама на Тройцу. А нарадзіўся і вырас у Смаргоні, на Гродзеншчыне. Паступіў у духоўную семінарыю ў Жыровіцах. Пасля яе заканчэння застаўся на Слонімшчыне.
— Вельмі тут атмасфера душэўная, цёплая, — прызнаецца святар. — Таму, калі прапанавалі заняцца аднаўленнем сядзібы і добраўпарадкаваннем тэрыторыі вакол, згадзіўся не раздумваючы.
Протаіерэй Дзмітрый Сёмуха працуе над добраўпарадкаваннем тэрыторыі ля сядзібы Солтана і стварэннем заасада на працягу амаль дзесяці гадоў.
Зараз на месцы, дзе некалі была сядзіба, — руіны. Дзмітрый Сёмуха расказвае, што пасля 1939 года апошніх тутэйшых жыхароў рэпрэсіравалі, а маёнтак неўзабаве прыйшоў у заняпад. Каб яго ўзнавіць, патрэбны малюнкі ці фотаздымкі, аднак яны не захаваліся. Таму пабудаваць дом у поўным падабенстве немагчыма.
Сёння на гэтай тэрыторыі знаходзіцца манастырскае падвор’е. Парк набывае прывабны выгляд. Протаіерэй успамінае, што, калі прыязджалі сюды дзесяць гадоў таму, бачылі толькі сухастой у рост чалавека. Расчысціць больш за пяцьдзясят гектараў зямлі здавалася непасільнай задачай.
— Прайшлі гады, і, як бачым, з Божай дапамогай удалося хаця б на некалькі крокаў наблізіцца да той мэты, якую паставілі ў пачатку, — гаворыць Дзмітрый Сёмуха.
Руіны сядзібы Аляксандра Солтана.
Сёлета на Свята Пакроваў адзначаць дзесяць год з пачатку аднаўленчых работ. За гэты час зараснік ператварыўся ў заалагічны сад з мноствам відаў звяроў і птушак. Інфармацыя аб цікавым парку адразу стала вядома турыстам не толькі з нашай краіны, але і за яе межамі. Наведвальнікі нават назву саду далі — «Эдэмскі», параўноўваючы яго з садам, у якім жылі Адам і Ева да грэхападзення. Тут ва ўмовах натуральнага асяроддзя жывуць розныя звяры, прычым некаторыя зусім без вальераў. Якраз незвычайная даверлівасць жывёл да чалавека і адрознівае гэты заасад ад іншых. Найперш уражваюць вавёркі, якія скачуць пад нагамі, быццам выпрошваючы ласункі. Побач — прыгажуні-лісіцы, што гуляюць з зайчыкамі, як са сваімі малымі дзецьмі. Айцец Дзмітрый расказвае, што ёсць і чырвоныя лісы — агнёўкі, і чарнабуркі. А ў іх дзіцянят футра атрымалася пярэстае.Ваўкі, якіх падаравала заасаду фермерская гаспадарка, таксама ручныя. Людзей не баяцца. На прагулку святар іх выводзіць на павадку. Ён называе ваўкоў ласкава — Хлопчык і Дзяўчынка. Прызнаецца, што даверлівымі яны выраслі, таму што выкармлены былі з соскі чалавечымі рукамі.
— Бывае, Хлопчык аскаліцца, але яшчэ не пакусаў нікога. А Дзяўчынка спакойная, — расказвае святар.
Калі ў ваўчынай сям’і з’явяцца дзіцяняты, іх, пасля таго як падрастуць, раздадуць у аграсядзібы, дзе таксама ствараюць заапаркі.
А вось і мядзведзь Таптыжка! Ён, нягледзячы на зіму, у спячку не лёг — навошта, калі і так някепска кормяць? Бадзёра хадзіў па вальеры, а ўбачыўшы мяне, падышоў да агароджы. Таптыжка з’ядае ў дзень больш за дзесяць кілаграмаў ежы. Гатуюць яе на спецыянальнай кухні, прычым і для астатніх жывёл таксама.
— Ехаў неяк з боку суседняй вёскі, бачу — бабры, — успамінае ён. — Падышоў бліжэй, гляджу — чалавека не баяцца. Здагадаўся, што гэта ж нашы нутрыі.
Цікава, што грызуны выходзяць за тэрыторыю заасада і заўсёды вяртаюцца назад. Ідзём па пясчанай дарозе і паводдаль заўважаем аленяў. Яны больш пужлівыя, да людзей блізка не падыходзяць.
Ёсць тут і яноты, і сурыкаты. Перад тым як прывезці ў заасад новы від, святар з памочнікамі вывучае спецыяльную літаратуру, каб стварыць для яго найлепшыя ўмовы існавання.
Адчуўшы прыезд гасцей, выходзяць са сваіх экалагічных хатак грацыёзныя страусы. Звыклыя да турыстаў, яны быццам падстаўляюць свае дзюбы і паварочваюць галовы ў бок фотакамеры. Айцец Дзмітрый перасцерагае:
— Яны любяць усё, што блішчыць, і могуць нават ухапіць прыгожую «цацку» з рук чалавека.
Гэтай цёплай зімой птушкам і звярам камфортна, а ў суровыя маразы іх перасяляюць у дом з пячным ацяпленнем.
Святар запрашае наведаць галубятню:
— Думаеце, галубы — не экзотыка? Яшчэ якая! Усе чатыры Евангеллі апісваюць хрышчэнне Ісуса на рацэ Іардан: «І на Яго зышоў Святы Дух — у цялесным выглядзе, у вобразе голуба». Невыпадкова голуба называюць птушкай міру. Так і ёсць. Калі, напрыклад, у куратнік падсадзіць чужую курыцу, яе, як новенькую, могуць затаўчы. А вось галубы ніколі не бываюць ваяўнічымі. За імі можна доўга назіраць, як яны ўважліва глядзяць табе ў вочы, варкуюць. Гэта любоў без усялякай крывадушнасці, тут нават чалавек з самымі цяжкімі думкамі ўміг становіцца добрым.
У заасад абіцелі прывозяць таксама хворых птушак і звяроў. Іх тут лечаць, кормяць. Так было і з сямю амаль нежыццяздольнымі бусламі, якіх перадалі святарам. Па вясне птушкі ачунялі, пяцёра буслоў адляцелі, а двое засталіся жыць у Жыровіцкім заасадзе і вось ужо другую зіму запар нават у вырай не адлятаюць.
— Прынеслі аднойчы маленькага філіна, — узгадвае бацюшка. — На жаль, выратаваць яго не атрымалася. Калі наш гадаванец памірае, вельмі цяжка перажываем. Прыняць тое, што «ўсё ў руках Божых», часам не атрымліваецца нават у нас, святароў.
Айцец Дзмітрый расказвае, што падчас аднаўленчых работ адкрыліся воку старадаўнія ліпавыя і кляновыя алеі. Многія дрэвы пасля абрэзкі і чалавечага клопату багата зацвілі вясной. Набралі сілу і маладыя дрэўцы. Дае добры ўраджай і яблыневы сад. Яго плады амаль круглы год у рацыёне студэнтаў духоўнай семінарыі. Вырошчваюць тут і жыта, і пшаніцу. Самі мелюць муку, выпякаюць з яе хлеб, булкі. Нязменныя памочнікі ў сельскагаспадарчай працы — коні гановерскай і кабардзінскай парод. У будучыні плануецца правядзенне верхавых прагулак, у тым ліку і з калыскамі. Акрамя гэтага, манастырскае падвор’е ўключае ў сябе свінаферму, рыбную гаспадарку.
Адчуць спагаду і любоў да ўсяго жывога на зямлі запрашаюць сюды і дзяцей. Бацюшка лічыць, што зносіны з жывой прыродай — добры сродак забыцца пра віртуальную рэальнасць у смартфонах і камп’ютарах і акунуцца ў сапраўднасць. Дзецям тут вельмі цікава. А дарослыя пры жаданні могуць не толькі адпачыць душой, але ж і папрацаваць — напрыклад, накалоць дроў ці прыбраць апалае лісце.
У незвычайным заасадзе можна знаходзіцца гадзінамі, не звяртаючы ўвагі на час, думаць пра вечнае. У гэтым, па словах протаіерэя Дзмітрыя, і ёсць сутнасць задумкі:
— Наша жаданне — зрабіць гэта месца прыгожым і жыватворным, каб людзям хацелася знаходзіцца ў гэтай красе, атрымліваць асалоду і пазітыўную энергію.
Развітваючыся са святаром Дзмітрыем Сёмухай, запыталася:
— Як удаецца спраўляцца з такой вялікай задачай: сагрэць і накарміць цэлы заапарк?
Па словах бацюшкі, гэта прыемны клопат:
— Калі бачыш вясёлых і жвавых звяроў, задаволеных людзей, якія кантактуюць з імі, на душы становіцца радасна. Бог пазнаецца не толькі ў царкве, увесь свет з’яўляецца ў шырокім сэнсе храмам Божым, а прырода праслаўляе мудрасць яе Стваральніка. Асабліва прыемна, што праца наша прыносіць карысць дзецям. І гэта сімвалічна. Нездарма ж ікона Бажай Маці явілася двойчы менавіта дзецям. Памятаеце, у Свяшчэнным Пісанні сказана: «Если не обратитесь и не будете, как дети, не войдете в Царство Небесное».
kuzmich@sb.by