Дакументы ад абітурыентаў, якія жадаюць атрымаць вышэйшую адукацыю на бясплатнай або платнай аснове, большасць дзяржаўных ВНУ будуць прымаць з 12 па 17 ліпеня. Выпускнікі профільных класаў педагагічнай накіраванасці змогуць падаць дакументы на педагагічныя спецыяльнасці з 12 па 14 ліпеня. Жадаючыя навучацца ў ВНУ сельскагаспадарчага профілю на завочнай форме — з 15 лістапада па 5 снежня. Такая інфармацыя са спасылкай на Міністэрства адукацыі апублікавана на Нацыянальным прававым інтэрнэт-партале.
Сёлетняя ўступная кампанія пройдзе без асаблівых змен. Захаваецца магчымасць здаваць чатыры прадметы на ЦТ, а таксама паступаць з сертыфікатамі папярэдняга года, якая з’явілася ў абітурыентаў летась. З новаўвядзенняў толькі павышаныя ніжнія парогавыя значэнні адзнак цэнтралізаванага
тэсціравання, якое ў гэтым годзе пройдзе з 12 чэрвеня па 2 ліпеня. Скажам, калі летась абітурыент, які марыў аб філалагічнай спецыяльнасці, мог паспытаць поспеху і з 20 баламі па профільным прадмеце, то цяпер адзнака павінна быць не ніжэйшай за 25. Сёлета таксама апрабуюць, але пакуль у рэжыме эксперыменту, новую метадалогію ацэнкі тэстаў ЦТ, распрацаваную Рэспублікан-скім інстытутам кантролю ведаў, якую збіраюцца ўкараніць у будучыні. Дырэктар інстытута Юрый Міксюк расказаў БелТА, што гэта ажыццяўляецца для таго, каб зрабіць ацэнку ведаў больш зразумелай: “Дзеючая методыка апрацоўкі вынікаў ЦТ зарэкамендавала сябе добра. Аднак сёння ўзнікае новая задача, якая патрабуе не проста ранжыравання, але і максімальна дакладнага, наколькі гэта магчыма, ацэньвання ведаў выпускнікоў школ”.
За ходам падрыхтоўкі і правядзення ўступных выпрабаванняў ва ўстановах вышэйшай і сярэдняй спецыяльнай адукацыі будзе сачыць створаная па ўказе Прэзідэнта дзяржаўная камісія на чале з намеснікам Прэм’ер-міністра Васілем Жарко.
КАМПЕТЭНТНА
Ігар Карпенка, міністр адукацыі:
— Мы зараз выконваем даручэнне Урада, Адміністрацыі Прэзідэнта і фактычна завяршылі распрацоўку праекта ўказа аб зацвярджэнні правілаў прыёму ў новай рэдакцыі. Хутчэй за ўсё, большасць навацый, якія мы плануем, закрануць уступную кампанію 2019 года. Таму сёння абітурыентам не варта хвалявацца, што нешта нечаканае раптам выплыве ва ўступнай кампаніі.
mila@sb.by
Сталі вядомыя тэрміны правядзення ўступнай кампаніі ва ўстановы вышэйшай адукацыі
Званок на экзамен
Полная перепечатка текста и фотографий запрещена. Частичное цитирование разрешено при наличии гиперссылки.