Жыццё за аўтамабіль

Злачынца, які падазраецца ў тым, што ён забіў магіляўчаніна і завалодаў машынай сваёй ахвяры, затрыманы ў Бабруйску.

Як расказаў першы намеснік начальніка УУС Магілёўскага аблвыканкама, кіраўнік крымінальнай міліцыі Аляксандр Васільеў, у загінуўшага было выяўлена мноства раненняў. Супрацоўнікі міліцыі, упраўлення Следчага камітэта па Магілёўскай вобласці аператыўна вызначылі асобу пацярпелага і яго магчымага забойцы.

На аснове першаснай інфармацыі міліцыянеры сталі шукаць сляды аўтамабіля, на якім ехаў загінуўшы. У вобласці быў уведзены план «Перахват». Як высветлілася, падазроны ў злачынстве даехаў да Бабруйска. Спецпадраздзяленні міліцыі затрымалі яго на адной з аўтастаянак і перадалі следчым. Зараз высвятляюцца ўсе абставіны гэтай крымінальнай справы.