Магутным драйверам актыўнага пераходу насельніцтва на выкарыстанне электраэнергіі стане ў бліжэйшы час запуск Беларускай АЭС. Для разумення маштабаў прывядзём шэраг лічбаў. Увод у эксплуатацыю найважнейшага для энергетычнай галіны праекта дасць магчымасць штогод замяшчаць каля 4,5 млрд кубічных метраў прыроднага газу, а таксама знізіць выкіды парніковых газаў больш чым на 7 млн тон у год.
Пакуль што гэта прагноз. І тым не менш ужо цяпер у краіне рэалізуецца комплексны план развіцця энергетычнай сферы і міжгаліновы комплекс мер па павелічэнні спажывання электраэнергіі. Толькі за паўгода колькасць электрамабіляў у краіне падвоілася. Па падліках спецыялістаў, гэта толькі пачатак. І шмат у чым дзякуючы стымулу з боку дзяржавы. Нядаўна зняты абмежаванні пры ўвозе электрамабільнай тэхнікі, стымулюецца вытворчасць зараднай апаратуры. Мінтранс жа плануе да 2025 года павялічыць долю электрыфікаванага гарадскога пасажырскага транспарту ў рэгулярных зносінах да 30 працэнтаў.
Яшчэ адзін перспектыўны напрамак — выкарыстанне электраэнергіі для ацяплення і гарачага водазабеспячэння. За паўгода спажыванне насельніцтвам электраэнергіі на гэтыя мэты вырасла амаль у тры разы ў параўнанні з мінулагоднім.
Дарэчы, аб’ём будаўніцтва шматкватэрных жылых дамоў, у якіх электраэнергія будзе выкарыстоўвацца для ацяплення, гарачага водазабеспячэння і прыгатавання ежы, у 2021 годзе плануюць павялічыць удвая. А сёлета ў краіне разлічваюць пабудаваць такія шматкватэрныя дамы агульнай плошчай 135 000 квадратных метраў. Працягнуць падключаць да электраэнергіі для гэтых мэт і індывідуальныя жылыя дамы. Толькі за восем месяцаў гэтага года зарэгістравана амаль 16 000 запытаў аб выдачы грамадзянам тэхнічных дакументаў на падключэнне электраўстановак аднакватэрных жылых дамоў да электрычных сетак для ацяплення, гарачага водазабеспячэння і прыгатавання ежы. Пры гэтым 78 працэнтаў з іх задаволены. У перспектыве электрадамы павінны скласці каля 30—40 працэнтаў ад агульнага ўводу жылля ў эксплуатацыю. Рэгіёнам планы па будаўніцтве такіх дамоў ужо даведзены.
І яшчэ. З уводам БелАЭС і ростам спажывання электраэнергіі для рэальнага сектара эканомікі плануюць устанавіць больш нізкія тарыфы на яе. Цяпер рэалізуецца міжгаліновы комплекс мер, дзякуючы чаму спажыванне электраэнергіі ў рэальным сектары эканомікі да 2026 года павялічыцца на 2,7 млрд кілават-гадзін. Міністэрства энергетыкі і Міністэрства антыманапольнага рэгулявання і гандлю прапрацоўваюць сістэму стымулюючых тарыфаў ад аб’ёмаў спажывання: чым вышэй аб’ёмы, тым менш тарыфы.
sichevich@sb.by
