Малюнкамі мастака Уладзіміра Сулкоўскага ілюстраваны тры біяграфічныя кнігі для дзяцей. Яны прысвечаны Якубу Коласу, Янку Купалу і Вінцэнту Дуніну-Марцінкевічу.
Мастак расказаў, што кнігі ў фармаце апавяданняў у малюнках выпускаюцца ў серыі “Славутыя імёны”. З восені мінулага года разам з аўтарам тэкстаў Андрэем Міраслававічам выдадзены тры кнігі агульным тыражом 7 тысяч асобнікаў. “Нягледзячы на даволі высокі кошт, кнігі вельмі хутка былі распрададзеныя, што сведчыць пра вялікую цікавасць дзяцей і іх бацькоў, а таксама бібліятэк да такіх выданняў. Цяпер працую над чацвёртай кнігай серыі, прысвечанай жыццю і творчасці паэта Максіма Багдановіча”, — сказаў Ул. Сулкоўскі.
Варта адзначыць, што ў краіне ўпершыню выпускаюцца дзіцячыя кнігі з біяграфіямі славутых людзей. “У афармленні малюнкаў да біяграфічных выданняў я выкарыстаў каляровыя алоўкі, хоць раней быў перакананы: такой тэхнікай карыстаюцца толькі дзеці ў дашкольных установах”, — адзначыў Ул. Сулкоўскі.
Разам з тым, падкрэсліў мастак, падрыхтоўка кожнага малюнка патрабавала карпатлівай працы, бо біяграфічнае выданне вельмі адрозніваецца па канцэпцыі ад ілюстравання звычайных кніг для дзяцей. “Мастацкія ілюстрацыі нават у дробязях павінны адпавя-даць гістарычнай рэчаіснасці і біяграфіі пісьменніка, а яго выява ў малюнку— максімальна адпавядаць знешнасці героя кнігі на пэўным этапе яго жыцця”, — падкрэсліў Ул. Сулкоўскі.
Для стварэння малюнкаў мастак, па яго словах, карыстаўся матэрыяламі, сабранымі падчас вандраванняў па краіне на працягу многіх гадоў.
Жыццё натхніла на творчасць
Малюнкамі мастака Уладзіміра Сулкоўскага ілюстраваны тры біяграфічныя кнігі для дзяцей. Яны прысвечаны Якубу Коласу, Янку Купалу і Вінцэнту Дуніну-Марцінкевічу