Сёння ва ўсіх, хто жадае здымаць, ёсць доступ да недарагой тэхнікі і магчымасць ствараць якасную карцінку. Аднак адзінкі дакументалістаў дамагаюцца поспехаў, як Пашкоўскі.
— За карцінкай павінна стаяць нешта большае, а менавіта — добра прадуманы сцэнарый, — падзяліўся сакрэтамі поспеху Леанід Пашкоўскі на майстар-класе ў межах міжнароднага фестывалю мабільнага кіно Smartfilm. — Многія думаюць, што калі ты здымаеш travel-праект, не трэба ні пра што думаць і клапаціцца. Бо падарожнічаць заўсёды крута і цікава — прыгоды, новыя людзі... Нічога падобнага! Зняць кароткі дакументальны метр — больш складана, чым нараджаць нешта з фантазіі.
Блогер прызнаецца, што перад паездкамі яму даводзіцца ўсё прадумваць да дробязяў — тэму, герояў, фармат гутаркі:
— Важна ўмець схіляць да сябе суразмоўцаў — уваходзіць у давер, дапамагаць і дэманстраваць зацікаўленасць.
Разам з тым, папярэджвае Пашкоўскі, трэба быць гатовым да таго, што ў апошні момант усе планы могуць раптам праваліцца. У такім выпадку сцэнарый і герояў неабходна прыдумляць на месцы.
— Найбольш складана, калі замест планаў падчас здымак не адбываецца нічога. Калі я быў у Грузіі, вырашыў наведаць адну вёску і трэба было ісці праз горы, — успамінае блогер. — Са мной наогул нічога не адбывалася. Але пашанцавала — прывязаўся сабака, і я стаў з ім размаўляць. Я называў яго Брат, і мая размова з ім і зрабіла гісторыю. Калі падчас здымак нічога не адбываецца, трэба знайсці нейкую дэталь з наваколля і зразумець, як за яе можна зачапіцца.
Леанід Пашкоўскі ўпэўнены, што ў бліжэйшыя гады інтэрнэт-дакументалісты будуць усё больш набліжацца да тэлевізійнай якасці і гісторыі selfmade-самавучкаў з аматарскай камерай у руках папросту знікнуць. Тым не менш ён раіць пачаткоўцам-дакументалістам не баяцца эксперыментаваць, шукаць свой асаблівы фармат і спрабаваць зарабляць на любімай справе.
— Сёння блог для мяне — гэта праца, але першапачатковая цікаўнасць, якую я адчуваў, калі пачынаў усю гэтую гісторыю з YouTube-каналам, нікуды не дзелася, — прызнаецца Пашкоўскі. — Як толькі яна знікне, з гэтай гісторыяй можна будзе заканчваць.
mila@sb.by