Пачыналася свята горада са святочнай літургіі ў Спаса-Праабражэнскай царкве. А потым можна было падзівіцца прыгажосці заслаўскіх кветак, зведзеных у шыкоўныя кампазіцыі, смаку мёду, што прывезлі пчаляры з усёй краіны, а таксама пакаштаваць прыдукцыю з прысядзібных заслаўскіх участкаў. Лепшыя кветкаводы і агароднікі былі ўзнагароджаны каштоўнымі падарункамі. Уражальным стала яскравае відовішча рыцарскіх бітваў, а таксама дэманстрацыі зброі і касцюмаў Сярэднявечча. Цікавай для гасцей свята аказалася і выстава работ удзельнікаў маладзёжнага фотапленэра ў музеі-запаведніку “Заслаўе”.
Кульмінацыяй Дня горада сталі ўрачыстасці на цэнтральнай плошчы, якія пачаліся тэатралізаваным гістарычным пралогам. Героямі свята сталі Пачэсныя грамадзяне Заслаўя, маладажоны і сем’і нованароджаных гараджан.
З самай раніцы і да позняга вечара на канцэртных пляцоўках не сціхала музыка. Павіншаваць заслаўцаў са святам горада прыехалі шматлікія калектывы Мінскага раёна і сталіцы, зоркі беларускай эстрады.