З унiверсiтэцкай аудыторыi ў следчы iзалятар трапiў выкладчык кафедры эканамiчнай кiбернетыкi матэматычнага факультэта Гомельскага дзяржунiверсiтэта iмя Францыска Скарыны. Ён падазраваецца ў атрыманнi хабару ад студэнтаў.
Праяўляючы слабасць да антыкварных рэчаў, выкладчык наведваў гандлёвыя цэнтры i прыватныя крамы, дзе прыглядаў сабе патрэбны тавар – распiсныя падносы, сервiзы, шкатулкi, вазы. Не грэбаваў спецыялiст дакладных навук i банальнымi аксесуарамi для камп’ютэра – клавiятурай, «мышкай», праязднымi бiлетамi, прадуктамi харчавання i iншай драбязой. Затым даваў практычныя заданнi групе жадаючых атрымаць запаветны запiс у залiкоўцы, якi тавар, у якой гандлёвай кропцы i за якi кошт набыць для яго. Да прыкладу, адна з падгруп студэнтаў перадала выкладчыку залiкоўкi разам з распiсаным ружамi падносам коштам 170 тысяч рублёў, iншая – рэдкую шкатулку.
Па iнфармацыi следчых, ужо сёння вядома аб 10 эпiзодах прыняцця хабару i каля 40 студэнтах, якiя наладжвалi падобныя «дзелавыя» стасункi са сваiм выкладчыкам.
