Тэхніка, нават самая сучасная, — гэта толькі палова поспеху. Ролю ў ім высокакваліфікаваных кадраў, якія, як здаўна вядома, вырашаюць усё, ніхто не адмяняў. Тым больш калі гаворка ідзе пра такі стратэгічна важны аб`ект, як Беларуская АЭС. Атамшчыкі ў любой краіне — асаблівая каста, спецыялісты высокага ўзроўню, якіх нават за пяць гадоў навучання ў ВНУ не падрыхтаваць. Ці хопіць нам на гэта часу, ці зможам мы падрыхтаваць высакакласных супрацоўнікаў для АЭС?
Фота Юрыя МАЗАЛЕЎСКАГА
Фота Юрыя МАЗАЛЕЎСКАГА
Кансультант упраўлення вышэйшай адукацыі Мінадукацыі Мікалай Маруда ўпэўнены: гэтая задача нам пад сілу. І не толькі таму, што маем даўнія традыцыі па навучанні гэтых спецыялістаў — шэраг беларускіх ВНУ ў часы Савецкага Саюза рыхтавалі будучых атамшчыкаў для ўсёй вялікай краіны. Ёсць стратэгія, дакладнае разуменне, якія спецыялісты нам спатрэбяцца, база для іх падрыхтоўкі. Сёння іх рыхтуюць чатыры ВНУ — БДУ, БНТУ, БДУІР, МДЭІ імя Сахарава. Але, што немалаважна, у кожнай з іх свой кірунак: адны рыхтуюць фізікаў-ядзершчыкаў, другія — эколагаў, трэція — тых, хто будзе стаяць ля пульта кіравання АЭС, а таксама займацца распрацоўкай аўтаматызаваных сістэм.
Дарэчы, цікавасць абітурыентаў да «атамных» спецыяльнасцей досыць высокая. Дастаткова ўспомніць апошнюю ўступную кампанію, калі конкурс на спецыяльнасці, звязаныя з ядзернай энергетыкай, вырас, а сума ўступных балаў на некаторыя павялічылася ў 1,5 раза ў параўнанні з папярэднімі наборамі. «Па асобных спецыяльнасцях прахадны бал быў вышэй за 300, — кажа Мікалай Маруда. — Нягледзячы на гэта, цяпер у профільных ВНУ веды атрымліваюць 800 студэнтаў. Дыпломы ўжо атрымалі звыш 350 чалавек».
Трэцяя частка маладых спецыялістаў, паводле яго слоў, працуюць на пляцоўцы будаўніцтва і непасрэдна трапілі ў штат адпаведнай арганізацыі, другая траціна размеркавана ў арганізацыі, якія звязаныя з крыніцамі іанізуючага выпраменьвання і абслугоўваюць ядзерную энергетыку, яшчэ частка працуе на аб`ектах радыяцыйнай энергетыкі, астатнія — у сумежных абласцях. Калі да 2014 года на «атамныя» спецыяльнасці штогод набіралі да 220 чалавек, цяпер гэтая лічба скарацілася да 125. У наступным жа годзе яна складзе толькі 95 чалавек. Па прагнозах Мінадукацыі і Мінэнерга, гэтай колькасці спецыялістаў будзе дастаткова і для камплектавання БАЭС, і для сумежных арганізацый.
Зрэшты, галоўнае не колькасць, а якасць: выпускнік ВНУ — гэта яшчэ не гатовы спецыяліст. «Атамная галіна павінна акумуляваць лепшыя кадры, — перакананы Мікалай Маруда. — Такім чынам, і падрыхтоўка спецыялістаў-атамшчыкаў павінна быць адпаведная. Мяркуйце самі: спачатку вядзецца базавая падрыхтоўка ва ўніверсітэце — гэта 4—6 гадоў, затым замежныя стажыроўкі — гэта яшчэ ад паўтара да двух гадоў. А тым, хто потым будзе працаваць у навуцы і адукацыі, яшчэ 2—3 гады прыйдзецца павучыцца ў магістратуры, аспірантуры».
Студэнты БДУІР вывучаюць кіраванне тэхналагічнымі працэсамі АЭС
Фота Аляксандра РУЖЭЧКА
Студэнты БДУІР вывучаюць кіраванне тэхналагічнымі працэсамі АЭС
Фота Аляксандра РУЖЭЧКА
Улічваючы ж хуткасць развіцця новых тэхналогій і адказнасць працы атамшчыка, яго навучанне і ўвогуле справа ўсяго жыцця. Дарэчы, падрыхтоўцы і перападрыхтоўцы такіх спецыялістаў дапаможа ўласны вучэбна-трэніровачны цэнтр, які запрацуе на БАЭС са студзеня 2016 года, кажа намеснік начальніка гэтага падраздзялення Аляксандр Ерын: «Выкладаць у нашым цэнтры будуць як айчынныя, так і запрошаныя спецыялісты, якія маюць вялікі вопыт працы на АЭС. Цэнтр мае самую сучасную апаратуру і цалкам адпавядае пульту кіравання станцыі». На імітатары магчыма змадэляваць любую няштатную сітуацыю і адпрацаваць шляхі яе рашэння. Дарэчы, такімі трэнажорамі аснашчаны ў свеце ўсе навучальныя цэнтры на сучасных атамных электрастанцыях, і такое патрабаванне прапісана ў беларускіх і міжнародных нарматыўных дакументах.
Зрэшты, гаворка сапраўды ідзе аб адзінкавых спецыялістах, і няма неабходнасці ставіць іх падрыхтоўку на паток. Напрыклад, у адпаведнасці з дзяржпраграмай да 2020 года МДЭІ імя Сахарава будзе выпускаць усяго 20 чалавек у год па спецыяльнасці «ядзерная і радыяцыйная бяспека». Папярэднія выпускі склалі ў першы год 15, другі — 25 чалавек. У лютым 2016-га тут атрымаюць дыпломы яшчэ 25 спецыялістаў. За тры гады БНТУ падрыхтаваў усяго 80 спецыялістаў, 29 з якіх сёння працуюць на БАЭС. Дарэчы, з 437 работнікаў ГП «Беларуская АЭС» 67 — маладыя спецыялісты.
У БНТУ, па словах загадчыка кафедры «Цеплавыя электрычныя станцыі» Мікалая Карніцкага, ганарацца не толькі даўнімі традыцыямі ў падрыхтоўцы атамшчыкаў, але і тым, што некаторыя высакакласныя кадры новай станцыі — іх былыя выпускнікі, як, напрыклад, начальнік турбіннага цэха Анатоль Ракач.
Як запэўніваюць ва ўсіх чатырох ВНУ, згодна з праектам тэхнічнай дапамогі «Развіццё інфраструктуры ядзернай энергетыкі і сістэмы падрыхтоўкі кадраў для ядзерна-энергетычнай праграмы» сюды пастаўлены самыя сучасныя камп’ютарныя навучальныя сістэмы па асновах палітыкі АЭС, кіравання і тэхналогіі. Студэнты маюць магчымасць змадэліраваць усе працэсы, у тым ліку няштатныя сітуацыі, якія адбываюцца ў самым сэрцы АЭС — атамным рэактары. Напрыклад, на трэнажоры можна правесці запуск рэактара, хоць у рэальнасці ў гэтым працэсе потым могуць удзельнічаць не ўсе з іх.
Цікавая вучоба, стажыроўкі... Але ад кваліфікацыі спецыяліста залежыць далёка не ўсё. Ніхто не адмяняў такія асабістыя якасці будучых атамшчыкаў, як адказнасць і працавітасць. Чалавечы фактар — важны складальнік поспеху, асабліва калі гаворка ідзе пра атам, нават калі ён мірны.
veraart14@mail.ru