У калядныя дні адкрываецца пасля рэканструкцыі і рамонту адна са старэйшых кнігарань сталіцы
Кнігарню «Кнігі і кніжачкі» лёгка знайсці, яна знаходзіцца ў самым цэнтры беларускай сталіцы, недалёка ад плошчы Незалежнасці. Жыхарам Мінска яна добра вядомая па сваёй колішняй назве — «Падпісныя выданні». Яе магазін насіў з 1959 года. Многія ў той час і пасля марылі стаць яго пастаяннымі пакупнікамі, сачылі за паступленнямі, выстройваліся ў даўжэзныя чэргі, каб зрабіць папярэдні заказ, з нецярплівасцю чакалі запрашэння яго выкупіць... Менавіта гэтая кнігарня была адзінай, дзе можна было падпісацца на зборы сачыненняў любімых аўтараў і стаць шчаслівым уладальнікам запаветных тамоў, што, дарэчы, удавалася далёка не ўсім жадаючым.
З 2008 года магазін атрымаў новую назву — «Кнігі і кніжачкі», стаў універсальным, з шырокім выбарам друкаваных выданняў самай разнастайнай тэматыкі. Каля трох месяцаў кнігарня была на рамонце і рэканструкцыі. Сёння яна зноў адчыніць дзверы для наведвальнікаў, сярод якіх у госці чакаюць і многіх беларускіх аўтараў.
Як расказаў «Р» генеральны дырэктар ААТ «Белкніга» Аляксандр Вашкевіч, абноўлены магазін парадуе большай плошчай гандлёвага зала. За кошт падсобных памяшканняў яна павялічылася на 50 квадратных метраў і складае цяпер 225 «квадратаў». Дзякуючы гэтаму з’явіліся лепшыя ўмовы для выкладкі кніг, яна стане больш еўрапейскай, больш адкрытай і зручнай. З іншых набыткаў — у кнігарні ўсталяваны кандыцыянеры, цеплавая завеса, зала аснашчана дынамікамі — музыка ў магазіне будзе гучаць пастаянна.
Як адзначае Аляксандр Вашкевіч, магазін «Кнігі і кніжачкі» прапануе сёння больш за 30 тысяч найменняў друкаваных выданняў. Адным з галоўных напрамкаў яго работы, як і раней, застанецца продаж і папулярызацыя кніжнай прадукцыі айчынных выдавецтваў. Але разам з тым цяпер з’явіцца і новы, які будзе надалей актыўна развівацца, — у магазіне створаны вялікі аддзел замежнай літаратуры на замежнай мове.
Адкрыццё крамы «Кнігі і кніжачкі» стане прыкметнай падзеяй сярод шматлікіх мерапрыемстваў маштабнай акцыі «Вялікія калядныя сустрэчы з кнігай», якая напрыканцы абвешчанага ў краіне Года кнігі праходзіць па ўсёй рэспубліцы. Нагадаем, акцыя стартавала 15 снежня. З гэтага часу ў гандлёвых залах кнігарань, бібліятэках, кінатэатрах, школах, музеях Брэста, Мінска, Пінска, Віцебска, Полацка, Оршы, Магілёва, Гродна і іншых гарадоў адбыліся сустрэчы з многімі беларускімі пісьменнікамі, знаёмствы з кніжнымі навінкамі, аўтограф-сесіі, дабрачынныя зборы кніг.
