Японія і пяць чарнобыльскіх раёнаў

Урад Японіі адобрыў выдзяленне паўтара мільёна долараў ЗША на рэалізацыю праекта на тэрыторыях Беларусі, якія пацярпелі ад аварыі на Чарнобыльскай АЭС.

Праект разлічаны на тры гады і непасрэдна закране інтарэсы як мінімум 50 тысяч жыхароў Слаўгарадскага, Столінскага, Чачэрскага, Брагінскага і Лунінецкага раёнаў. У ходзе яго рэалізацыі мяркуецца ў першую чаргу засяродзіцца на мінімізацыі наступстваў Чарнобыля.

Плануецца прадастаўленне экспертнай і тэхнічнай дапамогі па ўкараненні бяспечных і малазатратных метадаў вядзення сельскай гаспадаркі, павышэння яе прадукцыйнасці і садзейнічанне доступу на рынкі збыту. Адзін з важных кірункаў — павышэнне інфармаванасці мясцовага насельніцтва аб карысці здаровага ладу жыцця.
Адначасова мяркуецца істотна павысіць узровень ведаў аб радыяцыйнай бяспецы сярод дзяцей і падлеткаў. З гэтай нагоды плануецца стварэнне школьных цэнтраў радыяэкалагічнага інфармавання і навучання.

Васіль Харытонаў