Міністр інфармацыі Рэспублікі Беларусь Алег Праляскоўскі прыняў удзел у адзіным дні інфармавання, які прайшоў у Глыбоцкім раёне, і правёў прыём грамадзян па асабістых пытаннях у Чашніках.
У актавай зале Падсвільскага вінзавода не было дзе яблыку ўпасці. І гэта можна зразумець: міністры ў невялічкі гарадок прыязджаюць не так ужо і часта. Гаворка ішла пра першы год новай пяцігодкі, асноўныя арыенціры сацыяльна-эканамічнага развіцця краіны.
Калектыў прадпрыемства асаблівыя надзеі звязвае з Дырэктывай № 4 “Аб развіцці прадпрымальніцкай ініцыятывы і стымуляванні дзелавой актыўнасці ў Рэспубліцы Беларусь”. У прадпрыемства ёсць пэўныя праблемы з рэалізацыяй прадукцыі ў іншых рэгіёнах за межамі вобласці. З лібералізацыяй умоў ажыццяўлення гаспадарчай дзейнасці ёсць надзея, што справы наладзяцца. Міністр інфармацыі Алег Праляскоўскі на гэта адказаў, што Дырэктыва № 4 дае магчымасць адыходу ад адміністрацыйнага рэгулявання рынкавых адносін, што канкурыраваць трэба чэсна.
— Такая праблема, калі з адной вобласці ў другую нельга прадаць піва, смятану, сметанковае масла, а цяпер вось і віно, існавала і існуе,— заўважыў ён і паабяцаў, што просьбу падсвільскіх работнікаў перадасць ва ўрад.
У Глыбокім Алег Праляскоўскі наведаў рэдакцыю раённай газеты “Веснік Глыбоччыны”. Даведаўшыся пра тое, што ў мінулым годзе ў параўнанні з 2009-м калектыў атрымаў па выніках фінансава-гаспадарчай дзейнасці значны паказчык прыбытку, а тыраж газеты перавышае 6 тысяч экзэмпляраў, ён павіншаваў супрацоўнікаў газеты з поспехамі і пажадаў не толькі ўтрымацца на дасягнутым узроўні, але ўзняцца яшчэ вышэй. Падчас размовы былі закрануты пытанні, якія тычыліся падрыхтоўкі да Дня пісьменства, якое ў 2012 годзе пройдзе ў Глыбокім, пераходу газеты на друк у поўным колеры, павышэння заработнай платы работнікаў.
Падчас прыёму грамадзян у Чашніках да міністра звярнулася Ніна Васільеўна Валганкіна. Яе хвалюе пытанне атрымання льготнага крэдыту на будаўніцтва кватэры ў кааператыўным доме. Крэдыт хоча ўзяць яе сын. Двое знаёмых згадзіліся стаць паручыцелямі, але гэтага недастаткова...
— Дзяржава дапамагае чалавеку ў такім важным пытанні, як будаўніцтва жылля, — адказаў Алег Праляскоўскі. — Але ўсё павінна быць у рамках заканадаўства. Зараз рыхтуецца закон аб іпатэчным крэдытаванні, калі пры атрыманні крэдыту нерухомасць паступае ў залог банку як гарантыя вяртання крэдыту. Алег Вітольдавіч даручыў адпаведным службам яшчэ раз дэталёва прааналізаваць сітуацыю і праінфармаваць грамадзянку. Старшыня райвыканкама Уладзімір Булай прапанаваў як магчымы варыянт вырашэння праблемы разгледзець магчымасць выдзялення жылля сям’і ў дамах ААТ “Проземля-Агра”.
Фаіна Іванаўна Байкова расказала пра тое, што яе сын з жонкай пазбаўлены бацькоўскіх правоў, але ж расходы на ўтрыманне дзіцяці, апекуном якога з’яўляецца Фаіна Іванаўна, выплачвае толькі сын, жонка ўцякла і нідзе не працуе.
Міністр адзначыў, што сітуацыя вядомая. Неабходна знайсці жанчыну і не дазволіць ёй пазбягаць адказнасці, прымусіць яе працаваць і аплачваць расходы, як гэтага патрабуе Дэкрэт № 18 Прэзідэнта Рэспублікі Беларусь. Па-другое, можна дапамагчы сыну жанчыны знізіць цяжар фінансавай нагрузкі.
А вось дырэктар ААТ “Верхняе” Мікалай Дзярнейка з Глыбоцкага раёна падзяліўся з міністрам сваёй радасцю: у Верхнім не планавалася стварэнне аграгарадка, але дзякуючы намаганням мясцовай улады і насельніцтву за 96 дзён “метадам народнай будоўлі” аграгарадок узведзены. Стваральная праца заўсёды прыносіць задавальненне. Людзям заўсёды прыемна, калі іх умеюць выслухаць, даюць парады, калі яны адчуваюць клопат аб сабе.
