— Я шукаў свой сюжэт. І знайшоў, — расказвае Валянцін Елізар’еў. — Але, як ні дзіўна, не ў французскага пісьменніка Мэрымэ, а ў рускага паэта Блока. Яго цыкл вершаў «Кармэн» і лёг у аснову пастаноўкі ў Мінску. Я патэлефанаваў кампазітару Радзівону Шчадрыну, падзяліўся сваёй ідэяй, і ён з задавальненнем яе падхапіў, таму што гэта сапраўды іншае бачанне вобраза Кармэн. Шчаслівы, што тэатр вырашыў аднавіць балет. Спадзяюся, што мы робім спектакль, які будзе жыць на сцэне Вялікага яшчэ доўгія гады. Бо ён гаворыць пра галоўнае — пра Каханне...
Адноўленую «Кармэн-сюіту», такой, як яе ўбачыў 45 гадоў таму Валянцін Елізар’еў, пакажуць 24 красавіка. У дзень новага нараджэння балета гледачы змогуць таксама пагутарыць з самім Валянцінам Мікалаевічам, задаць пытанні выканальніцам галоўнай партыі ў балеце, атрымаць аўтограф ад любімых артыстаў. Падарункам стане рэтраспектыўная выстава фотаздымкаў — у наведвальнікаў тэатра будзе магчымасць зазірнуць у мінулае і ўбачыць сцэны са спектакля «Кармэн-сюіта», пачынаючы з далёкага 1974 года.
